بيىل قوستاناي قالاسىندا 90 كوشە كۇردەلى, ورتاشا جوندەۋدەن ءوتىپ, 50 شاقتى اۋلا اباتتاندىرىلادى. اتالعان جۇمىستارعا قوماقتى قارجى ءبولىنىپ وتىر, دەپ جازادى Egemen.kz.
قازىردىڭ وزىندە وبلىس ورتالىعىنىڭ سيانوۆ, گوگول, رابوچي كوشەلەرىندە جول جوندەۋ جۇمىستارى قىزۋ ءجۇرىپ جاتىر. مىسالى, سيانوۆ كوشەسىنىڭ ەنى 14 مەترگە دەيىن كەڭەيتىلىپ, ينجەنەرلىك كوممۋنيكاتسيانىڭ ءبارى باستان-اياق جاڭارتىلادى. جاڭا توسەمتاستار توسەلىپ, جاياۋ جۇرگىنشىلەرگە ارنالعان جيەكجولدار جوندەلەدى. قۇرىلىس جۇمىستارىن «ارۆيس» جشس جۇرگىزىپ جاتىر.
«جوبانىڭ قۇنى 1,6 ملرد تەڭگەدەن اسادى. جۇمىستى قىركۇيەك ايىنا دەيىن اياقتاۋدى جوسپارلاپ وتىرمىز. قازىر جۇمىس ءۇش جەردە بىردەي ءجۇرىپ جاتىر. ەكى اپتا شاماسىندا تاۋەلسىزدىك كوشەسىنە دەيىنگى ۋچاسكەنى جاڭا جول توسەۋگە ازىرلەپ بىتەمىز. قارجى جەتكىلىكتى, تەحنيكا مەن جۇمىس كۇشى ساقاداي ساي. ازىرگە ەشقانداي قولبايلاۋ جوق», دەيدى مەردىگەر ۆلاديمير اۆەتيسيان.