لەگاتون جاساندى ينتەللەكت داۋىرىندەگى ەتيكا, قۇقىق تاقىرىبىنا ارنالدى. Maqsut Narikbayev University-دە ۇيىمداستىرىلعان چەمپيوناتقا قازاقستان, قىرعىزستان, رەسەي جانە وزبەكستان ەلىنىڭ ستۋدەنتتەرى قاتىستى, دەپ جازادى Egemen.kz.
مەملەكەت باسشىسى قاسىم-جومارت توقاەۆ جاساندى ينتەللەكت سالاسىندا ەل ازاماتتارىنىڭ ساۋاتىن ارتتىرىپ, بىلىكتىلىگىن ارتتىرۋدىڭ ماڭىزدىلىعىن ۇنەمى ايتىپ كەلەدى. ماڭعىستاۋ وبلىسىنا جۇمىس ساپارىندا دا پرەزيدەنت جاڭا تەحنولوگيالار مەن جي باعىتتارىن دامىتۋدىڭ وزەكتىلىگىنە ەرەكشە نازار اۋداردى.
جي سىن-قاتەرلەرىنە ارنالعان لەگاتون تاقىرىبى الا-توو حالىقارالىق ۋنيۆەرسيتەتى (قىرعىزستان), ۋرگيۋ (ەكاتەرينبۋرگ, رەسەي), «جوعارى ەكونوميكا مەكتەبى» عىلىمي-زەرتتەۋ ۋنيۆەرسيتەتى (ماسكەۋ, رەسەي), تگيۋ (تاشكەنت, وزبەكستان), MNU (استانا), Yessenov University (اقتاۋ), ءال-فارابي اتىنداعى قازۇۋ, AlmaU, ابىلاي حان اتىنداعى قازحقجاتۋ (بارلىعى الماتى قالاسىنان) ستۋدەنتتەرىنىڭ ەرەكشە قىزىعۋشىلىعىن تۋدىردى.
زاڭ سالاسىنداعى چەمپيونات زەرتتەۋ فورۋمىمەن بىرىكتىرىلدى. توعىز ستۋدەنتتىك كوماندا ەكى كۇن بويى جاساندى ينتەلەكتىنىڭ ادام قۇقىعىنا اسەرى, سالاداعى سىن-قاتەرلەر كەيسىن تالداپ, نورماتيۆتىك تاسىلدەردى ازىرلەدى. ودان بولەك تسيفرلىق قۇقىقتىڭ وزەكتى ماسەلەلەرى جونىنەن زەرتتەۋ جوبالارىن قورعادى.
«Legathon ءوز ءومىرىن زاڭ ۇستەمدىگى مەن ادىلەتتىلىكتى ورنىقتىرۋعا ارناعان رەكتور ماقسۇت سۇلتان ۇلى نارىكباەۆتىڭ تۋعانىنا 85 جىل تولۋىنا وراي ءوتىپ جاتىر. ءبىز يدەيالار بىرىگەتىن كەڭىستىك قۇرعىمىز كەلەدى, ال ستۋدەنتتەر تەك قاتىسۋشىلار ەمەس, جاڭا زاڭ شەشىمدەرىنىڭ تەڭ اۆتورلارىنا اينالادى», دەپ اتاپ ءوتتى MNU باسقارما توراعاسى تالعات نارىكباەۆ.
ستۋدەنتتەر دەنساۋلىق ساقتاۋ سالاسىندا جي پايدالانۋ كەيسى بويىنشا شەشىمدەردى جانە اۆتورلىق زەرتتەۋلەردى ۇسىندى. ولار دەربەس جي-جۇيەلەردى جاۋاپكەرشىلىككە تارتۋ, جەكە تۇلعانىڭ ساندىق كوشىرمەلەرىن مودەلدەۋ سىندى تاقىرىپتاردى قاۋزادى.
قاتىسۋشىلار جۇمىسىن باس پروكۋراتۋرا, ادىلەت مينيسترلىگى, جوعارعى سوت وكىلدەرى مەن جەتەكشى حالىقارالىق جانە قازاقستاندىق زاڭ كومپانيالارىنىڭ سەرىكتەستەرىنەن قۇرالعان جوعارى كاسىبي قازىلار القاسى باعالادى.
«بارلىعى جوعارى دەڭگەيدە, ءتىپتى ۇساق-تۇيەككە دەيىن ويلاستىرىلعان. مىسالى, ءبىز تەك داۋىس بەرگەننەن كەيىن عانا قاتىسۋشىلاردىڭ قاي ۋنيۆەرسيتەتتەن كەلگەندەرىن بىلدىك. مۇنداي جارىستار ستۋدەنتتەرگە ناعىز پراكتيكا مەن باعا جەتپەس تاجىريبە الۋعا مۇمكىندىك بەرەدى», دەدى ادىلەت ۆيتسە-ءمينيسترى دانيەل ۆايسوۆ.
ءبىرىنشى ورىن رەسەيدەن كەلگەن «جوعارى ەكونوميكا مەكتەبى» عىلىمي-زەرتتەۋ ۋنيۆەرسيتەتىنىڭ ستۋدەنتتەرىنە بۇيىردى. جۇلدە قورى 1,7 ميلليون تەڭگەنى قۇرادى.
ء«ىس-شارانىڭ اتموسفەراسى كەرەمەت. ءبىزدىڭ جۇمىسىمىزدىڭ جوعارى باعالانعانىنا قۋانىشتىمىز», دەدى توپ مۇشەسى تاتيانا.