رەسەي فەدەراتسياسىنا رەسمي ساپارى بارىسىندا پرەمەر-مينيستر ولجاس بەكتەنوۆ پەن رف ۇكىمەتىنىڭ توراعاسى ميحايل ءميشۋستيننىڭ اراسىندا جۇرگىزىلگەن كەلىسسوز بارىسىندا ەكى مەملەكەت باسشىلارى دەڭگەيىندە قول جەتكىزىلگەن ۋاعدالاستىقتاردى ءىس جۇزىندە جۇزەگە اسىرۋعا, ونىڭ ىشىندە ءوزارا تاۋار اينالىمىن $30 ملرد-قا دەيىن ارتتىرۋعا نازار اۋدارىلدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
كولىك-ترانزيتتىك ىنتىماقتاستىق, اۋىل شارۋاشىلىعى, قورشاعان ورتانى قورعاۋ, ەنەرگەتيكا جانە گاز, عارىش سالالارىنداعى, سونداي-اق مادەني-گۋمانيتارلىق بايلانىستارداعى ءوزارا ءىس-قيمىل ماسەلەلەرى قارالدى.
وتكەن جىلى ەكىجاقتى تاۋار اينالىمى كولەمى شامامەن 3%-عا ءوسىپ, $27,8 ملرد-قا جەتتى. بيزنەس سۋبەكتىلەرى 45,4 مىڭعا جۋىق جۇمىس ورنىن اشۋ ارقىلى بىرلەسىپ 171 جوبانى ىسكە اسىرادى.
ەكىجاقتى ىنتىماقتاستىقتىڭ ماڭىزدى باعىتتارىنىڭ ءبىرى – اگروونەركاسىپ كەشەنىندەگى ءوزارا ءىس-قيمىل. وتكەن جىلدىڭ قورىتىندىسىنا سايكەس, ەكىجاقتى نەگىزدەگى ءوزارا شەكتەۋلەردى الىپ تاستاۋ ناتيجەسىندە سالاداعى تاۋار اينالىمى 4,5%-عا ءوسىپ, $3,8 ملرد-تى قۇرادى.
كولىك-ترانزيتتىك باعىتتا بىلتىرعى جىلدىڭ قورىتىندىسى بويىنشا «سولتۇستىك – وڭتۇستىك» حالىقارالىق ءدالىزىنىڭ شىعىس تارماعى بويىنشا جۇك اعىنىنىڭ كورسەتكىشتەرى 2,4 ملن تونناعا دەيىن ءوستى.
تاراپتار ءوزارا ساۋدانىڭ وڭ ديناميكاسىن ساقتاۋدىڭ ماڭىزدىلىعىن اتاپ ءوتتى. ەكىجاقتى ساۋدا اينالىمىن ارتتىرۋدا جانە ءوزارا ءىس-قيمىلدىڭ كەڭ اۋقىمدى ماسەلەلەرىن شەشۋدە ىنتىماقتاستىق جونىندەگى ۇكىمەتارالىق كوميسسيانىڭ قىزمەتى ەرەكشە ماڭىزعا يە.
كەلىسسوزدەر قورىتىندىسى بويىنشا ءوزارا ءتيىمدى ساۋدا-ەكونوميكالىق ىنتىماقتاستىقتى نىعايتۋ نيەتتەرى راستالدى.