2024 جىلدىڭ 18 قاراشاسىنان باستاپ قازاقستاندا تسيفرلىق كوشپەندىلەر ءۇشىن ۆيزانىڭ جاڭا ءتۇرى – Neo Nomad Visa ەنگىزىلدى, دەپ حابارلايدى Egemen.kz.
ول قاشىقتان جۇمىس ىستەيتىن جانە جۇمىستى ساياحاتپەن بىرىكتىرەتىن شەتەلدىك ازاماتتارعا ارنالعان.
تۋريزم جانە سپورت مينيسترلىگىنىڭ مالىمەتىنشە, ۆيزا ەنگىزىلگەننەن بەرى قازاقستان رەسپۋبليكاسىنىڭ شەتەلدەگى كونسۋلدىق مەكەمەلەرى 11 شەتەلدىككە ۆيزا بەرگەن, ونىڭ ىشىندە ۇلىبريتانيا, وڭتۇستىك كورەيا, سينگاپۋر, اقش, پورتۋگاليا ازاماتتارى بار.
بۇل ۆيزا شەتەل ازاماتتارىنا جۇمىسقا ورنالاسۋ قۇقىعىنسىز ۇزاق مەرزىمگە ەل بويىنشا ساياحاتتاۋعا مۇمكىندىك بەرەدى.
Neo Nomad ۆيزاسىن الۋ ءۇشىن قازاقستان رەسپۋبليكاسىنىڭ شەتەلدەگى مەكەمەسىنە بىرنەشە قۇجاتتاردى تاپسىرۋ قاجەت:
3000 اقش دوللارىنان اساتىن ايلىق كىرىستى راستايتىن سوڭعى 6 ايداعى بانك ءۇزىندىسى; ازاماتتىعى بار ەلدىڭ قۇزىرەتتى ورگانى بەرگەن سالىق دەكلاراتسياسى; ازاماتتىق نەمەسە تۇراقتى ءومىر سۇرەتىن ەلدىڭ ورگانى بەرگەن سوتتىلىعىنىڭ جوقتىعى تۋرالى انىقتاما; ۆيزانىڭ جارامدى مەرزىمىنە مەديتسينالىق ساقتاندىرۋ; قازاقستانداعى تۋريستىك كومپانيانىڭ شاقىرتۋى (48 ەلدىڭ ازاماتتارى ءۇشىن تالاپ ەتىلمەيدى).Neo Nomad ۆيزاسىنا ءوتىنىش بەرۋ پروتسەسى 5 جۇمىس كۇنىنەن اسپايدى.
ۆيزا 1 جىلعا دەيىنگى مەرزىمگە بەرىلەدى جانە ۇزارتىلۋى مۇمكىن. نەگىزگى ءوتىنىش بەرۋشىنىڭ وتباسى مۇشەلەرى دە ۆيزا الۋعا قۇقىلى.
ايتا كەتۋ كەرەك, بۇل ۆيزا قازاقستاندا جۇمىسقا ورنالاسۋ مۇمكىندىگىن قاراستىرمايدى. قازاقستان رەسپۋبليكاسى سالىق كودەكسىنىڭ 216-بابىنا سايكەس Neo Nomad Visa يەسى قازاقستاندا سالىق تولەۋگە مىندەتتى ەمەس, ويتكەنى ونىڭ تابىس كوزى ەلدەن تىس جەردە.