ءماجىلىس دەپۋتاتتارى ۇكىمەت ساعاتىنىڭ قورىتىندىسى بويىنشا اتقارۋشىلىق ءىس جۇرگىزۋ سالاسىنداعى وزەكتى ماسەلەلەردى شەشۋ ءۇشىن ادىلەت مينيسترلىگى مەن باسقا دا ۋاكىلەتتى ورگاندارعا بىرقاتار ۇسىنىستار جولدادى. سولاردىڭ ىشىندەگى ەڭ ماڭىزدىلارىنىڭ ءبىرى – اليمەنت تولەۋدەن جالتارعان اتا-انالاردىڭ ورنىنا كامەلەتكە تولماعان بالالارعا قارجىلاي قولداۋ كورسەتۋ ماقساتىندا مەملەكەتتىك اليمەنت قورىن قۇرۋ, دەپ حابارلايدى Egemen.kz.
دەپۋتاتتار اتالعان باستامانى بالالاردىڭ كونستيتۋتسيالىق قۇقىقتارىن قورعاۋ قاجەتتىلىگىمەن تۇسىندىرەدى. قور ارقىلى اليمەنت ۋاقىتىلى تولەنىپ, كەيىن بورىشكەردەن مەملەكەت ەسەبىنەن ءوندىرىلىپ الىنۋى ءتيىس.
سونداي-اق ءماجىلىس وكىلدەرى جەكە سوت ورىنداۋشىلارىنا قاتىستى بىرقاتار تۇبەگەيلى وزگەرىستەردى ۇسىندى. ولار:
اتقارۋشىلىق ءىس جۇرگىزۋدىڭ اشىقتىعى مەن تيىمدىلىگىن ارتتىرۋ ءۇشىن جەكە سوت ورىنداۋشىلارىنىڭ تارتىپتىك جاۋاپكەرشىلىگىن كۇشەيتۋ; كاسىبي تالاپتاردى قاتاڭداتۋ: اتتەستاتتاۋدان جانە تاعىلىمدامادان وتپەگەن ادامدارعا ليتسەنزيا بەرمەۋ; مەملەكەتتەن ءوندىرىپ الۋ, تالاپ قويۋدى قامتاماسىز ەتۋ سياقتى كەيبىر ىستەر بويىنشا وڭايلاتىلعان ءىس جۇرگىزۋ ءتارتىبىن كەڭەيتۋ.دەپۋتاتتار بورىشكەرلەردىڭ تابىس كوزدەرىن جاسىرۋ جاعدايلارىن ازايتۋ ءۇشىن ولاردىڭ ەلەكتروندى اميانداعى قاراجاتىن, بۋكمەكەرلىك كەڭسەلەردەگى ۇتىستارىن, باعالى قاعازدار مەن كريپتوۆاليۋتالاردان تۇسكەن كىرىستى, بلوگينگتەن جانە تاكسي قىزمەتىنەن نەمەسە جەلىلىك ماركەتينگتەن تاپقان تابىسىن انىقتاۋعا مۇمكىندىك بەرەتىن تەتىكتەردى ازىرلەۋدى دە ۇسىندى.
سونىمەن قاتار, ىشكى ىستەر ورگاندارىنىڭ سوت ورىنداۋشىلارىنىڭ قاتىسۋىمەن بورىشكەرلەردى ماجبۇرلەپ جەتكىزۋ فۋنكتسياسىن ناقتى قۇقىقتىق نەگىزگە وتىرعىزۋ قاجەت ەكەنى ايتىلدى.
جالپى, دەپۋتاتتار ادىلەت مينيسترلىگىنە ءوندىرىپ الۋشىلار مەن بورىشكەرلەردىڭ قۇقىقتارىن تەڭ دارەجەدە قورعاۋعا باعىتتالعان, اتقارۋشىلىق ءىس جۇرگىزۋدى كەشەندى جەتىلدىرۋگە ارنالعان زاڭنامالىق وزگەرىستەر توپتاماسىن ازىرلەۋدى تاپسىردى.