قر تۋريزم جانە سپورت ءمينيسترى ەربول مىرزابوسىنوۆ دۇنيەجۇزىلىك ەتنوسپورت كونفەدەراتسياسىنىڭ باسشىلىق قۇرامىنا ەندى. بۇل جايىندا سانكت-پەتەربۋرگ قالاسىندا وتكەن ء«داستۇرلى سپورت تۇرلەرىن قايتا جاڭعىرتۋ» اتتى VII ەتنوسپورت فورۋمى بارىسىندا كونفەدەراتسيا پرەزيدەنتى ءبىلال ەردوعان رەسمي تۇردە جاريالادى, دەپ حابارلايدى Egemen.kz.
فورۋمعا الەمنىڭ 75 ەلىنەن دەلەگاتتار مەن سالا ساراپشىلارى قاتىسىپ, ءداستۇرلى سپورت تۇرلەرىن ساقتاۋ مەن دامىتۋعا باعىتتالعان تاقىرىپتىق سەسسيالار, پىكىرتالاستار جانە ستراتەگيالىق كەزدەسۋلەر وتكىزىلگەن.
كونفەدەراتسيا پرەزيدەنتى ءبىلال ەردوعان قازاقستاننىڭ ەتنوسپورتتى دامىتۋ جولىنداعى بەلسەندى ءارى جۇيەلى جۇمىسىنا جوعارى باعا بەردى.
«قازاقستان ەتنوسپورتتى جاڭعىرتۋدا ۇلگى بولارلىق قادامدار جاساپ كەلەدى. بۇل تاجىريبەنىڭ حالىقارالىق ارەنادا ماڭىزى زور. مينيستر ەربول مىرزابوسىنوۆتىڭ كونفەدەراتسيا باسشىلىعىنا ەنۋى – حالىقارالىق قاۋىمداستىقتىڭ قازاقستانعا دەگەن سەنىمىنىڭ ناقتى كورىنىسى», دەدى ول.