مەملەكەت باسشىسى قاسىم-جومارت توقاەۆ ماڭعىستاۋ وبلىسىنا جاساعان جۇمىس ساپارىندا ءوڭىردىڭ ەكولوگيالىق احۋالىنا ەرەكشە نازار اۋدارىپ, بۇل ماسەلەنى شەشۋدى ۇكىمەت پەن وبلىس اكىمدىگىنىڭ باستى مىندەتتەرىنىڭ ءبىرى رەتىندە اتادى, دەپ حابارلايدى Egemen.kz.
پرەزيدەنتتىڭ ايتۋىنشا, وبلىس ورتالىعى اقتاۋ قالاسىنىڭ اينالاسىندا ونەركاسىپتىك كاسىپورىندار شوعىرلانعان. ولار ەكولوگياعا كەلتىرىپ جاتقان زياندى ازايتۋ ءۇشىن تابيعاتتى قورعاۋ تالاپتارىن قاتاڭ ساقتاۋى ءتيىس. بۇل باعىتتا باقىلاۋ كۇشەيتىلىپ, زاڭ بۇزۋشىلىقتارعا جول بەرىلمەۋى كەرەك.
ەل پرەزيدەنتى بىرنەشە جىلدان بەرى وزەكتى بولىپ كەلە جاتقان «قوشقار-اتا» قالدىقتار قويماسى ماسەلەسىنە ەرەكشە توقتالدى. اتالعان اۋماقتا بۇرىنعى كاسپي ماڭى تاۋ-كەن مەتاللۋرگيا كومبيناتىنا قاراستى ءۇش زاۋىتتان شىققان 105 ميلليون توننا وندىرىستىك قالدىق جينالعان. بۇل ەكولوگيالىق تۇرعىدان اسا قاۋىپتى ايماق رەتىندە باعالانىپ وتىر.
«بۇدان بولەك, ايماقتاعى پوليگونداردا 200 مىڭ توننادان استام قوقىس جينالىپ قالعان. رۇقسات ەتىلمەگەن جەرگە زاڭسىز تاستالعان قوقىستار دا كوپ. جالپى وبلىستا قوقىس تاستايتىن 68 رۇقسات ەتىلمەگەن ورىن بار. ونىڭ الپىسى جويىلدى, سەگىزى كاسىپكەرلەرگە تيەسىلى جەردە ورنالاسقان. مۇنىڭ ءبارى حالىقتىڭ تۇرمىس ساپاسىنا كەرى اسەرىن تيگىزىپ وتىر. وسى ماسەلەلەردى شۇعىل شەشۋ ءۇشىن ۇكىمەت وبلىس اكىمدىگىمەن بىرگە قاجەتتى شارالاردى قابىلداۋعا ءتيىس. بۇل ماسەلە بويىنشا ۇكىمەت توقسان سايىن ماعان تىكەلەي بايانداۋى كەرەك», دەدى قاسىم-جومارت توقاەۆ.
پرەزيدەنت «تازا قازاقستان» جالپىۇلتتىق اكتسياسى اياسىندا ەلدى مەكەندەردى اباتتاندىرۋ, كوگالداندىرۋ جۇمىستارىن جالعاستىرۋدى تاپسىردى. اقتاۋ قالاسىندا كوبىرەك اعاش وتىرعىزۋ قاجەتتىگىن اتاپ ءوتتى. ول «تازا» دەگەن ۇعىمنىڭ حالقىمىزدىڭ بولمىسىنداعى كيەلى ماعىناسى بار ەكەنىن ەسكە سالىپ, بۇل تۇسىنىك ءاربىر ازاماتتىڭ ءومىر ءسۇرۋ مادەنيەتىنىڭ ءبىر بولىگىنە اينالۋى ءتيىس ەكەنىن ايتتى.
مەملەكەت باسشىسى ەكولوگيا ماسەلەلەرىن شەشۋ تەك ۇكىمەت پەن جەرگىلىكتى اتقارۋشى ورگانداردىڭ عانا ەمەس, بۇكىل قوعامنىڭ ورتاق مىندەتى ەكەنىن ايتىپ, بارلىق جاۋاپتى تاراپتاردى ناقتى ارەكەتكە كوشۋگە شاقىردى.