ماڭعىستاۋعا بيزنەستى قولداۋعا قارجى بولىنەدى - پرەزيدەنت

ايتا كەتەيىك, قازىرگى تاڭدا وبلىستا 77 مىڭ شاعىن جانە ورتا بيزنەس نىسانى جۇمىس ىستەپ تۇر. ولار 150 مىڭ ادامعا جۇمىس بەرىپ وتىر. بىلتىر كاسىپ يەلەرى شىعارىپ جاتقان ءونىم كولەمى 270,5 ميللياردقا ءوسىپ, 2,2 تريلليون تەڭگەگە جەتكەن.

«بيىل ايماقتاعى شاعىن جانە ورتا بيزنەستى قولداۋ ءۇشىن مەملەكەتتىك بيۋدجەتتەن 16 ميلليارد تەڭگەدەن استام قارجى بولىنەتىن بولدى. قازىردىڭ وزىندە 12,5 ميلليارد تەڭگە ءبولىنىپ, 150 جوباعا قولداۋ كورسەتىلگەن. بۇدان بولەك, جاقىن ارادا «Mangystau Business» باعدارلاماسى ىسكە قوسىلادى. وسى اۋقىمدى جۇمىستىڭ اياسىندا 30 جاڭا جوباعا قارجى بولىنبەك, جالپى سوماسى 1,5 ميلليارد تەڭگە بولادى. وزدەرىڭىز بىلەسىزدەر, وبلىستىڭ ءوز ەرەكشەلىگى بار. اتاپ ايتقاندا, مۇناي ءوندىرىسىنىڭ باسىم بولۋى, ءشولدى جەردە تۇرعانى, سۋ تاپشىلىعى, ازىق-ت ۇلىك يمپورتىنا تاۋەلدىلىك. سوندىقتان جوسپارداعى بارلىق شارۋانى ءتيىمدى ىسكە اسىرۋ ءۇشىن مەملەكەتتىك ورگانداردىڭ ءبارى جۇمىلا جۇمىس ىستەۋى كەرەك», دەدى پرەزيدەنت.

سونىمەن قاتار مەملەكەت باسشىسى «اقتاۋ تەڭىز پورتى» ارنايى ەكونوميكالىق ايماعى وبلىستاعى كاسىپكەرلىكتى دامىتۋعا ەرەكشە سەرپىن بەرەتىن ورتالىق بولۋعا ءتيىس ەكەنىن اتاپ ءوتتى. قازىر وندا 22 جاڭا جوبا جۇزەگە اسىرىلىپ جاتىر. ارنايى ەكونوميكالىق ايماققا سالىنعان ينۆەستيتسيانىڭ جالپى كولەمى – 337 ميلليارد تەڭگە بولدى, سونىڭ تەڭ جارتىسى – شەتەل ينۆەستيتسياسى.

«بيىل ارنايى ەكونوميكالىق ايماقتىڭ اۋماعىن جەتى ەسە ۇلعايتۋ جوسپارلانىپ وتىر, ياعني, 3,7 مىڭ گەكتاردان 26,5 مىڭ گەكتارعا دەيىن. بۇل – ورىندى شەشىم. اكىمنىڭ دە ەكونوميكالىق ايماققا قاتىستى ۇسىنىستارى بار. حالىق تۇتىناتىن تاۋارلاردى, سونىڭ ىشىندە ازىق-ت ۇلىك ءوندىرىسىن ەكونوميكالىق قىزمەت تۇرىنە قوسۋعا بولادى. دەگەنمەن جوعارى ساپالى ءونىم شىعارىپ, جاڭا جۇمىس ورىندارىن اشۋعا مۇمكىندىك بەرەتىن وڭدەۋ سەكتورىنا باسىمدىق بەرۋ قاجەت. ۇكىمەت پەن اكىمدىك وسى سالاعا ەگجەي-تەگجەي تالداۋ جاساپ, ءتيىمدى جۇمىس جۇرگىزۋگە ءتيىس. قاعازباستىلىق بولماۋى كەرەك, ناقتى, ناتيجەلى جۇمىس قاجەت», دەدى قاسىم-جومارت توقاەۆ.