مەملەكەت باسشىسى ماڭعىستاۋ وبلىسىنا جۇمىس ساپارى بارىسىندا ۇكىمەت پەن «سامۇرىق-قازىنا» قورىنا ايماقتاعى سۋ تاپشىلىعىن ازايتۋ ءۇشىن ناقتى شەشىم قابىلداۋدى تاپسىردى, دەپ حابارلايدى Egemen.kz.
«وبلىستاعى باستى مىندەتتىڭ ءبىرى – تۇرعىنداردى تازا اۋىز سۋمەن قامتاماسىز ەتۋ. تابيعي وسىمگە جانە كوشى-قون ۇدەرىسىنە بايلانىستى ايماقتاعى حالىق سانى ۇزدىكسىز ءوسىپ كەلەدى. بۇل ماسەلە بويىنشا مەن جاڭا دا ايتىپ كەتتىم. سوندىقتان اۋىز سۋ ماسەلەسىنىڭ وزەكتىلىگى كۇن وتكەن سايىن ارتا تۇسەدى», دەدى مەملەكەت باسشىسى.
پرەزيدەنت ماەك-ءتىڭ سۋ تۇشىتۋ قۋاتى جەتكىلىكسىز بولىپ تۇرعانىن ايتىپ ءوتتى.
«سونىڭ كەسىرىنەن اسىرەسە, جاز ايلارىندا اۋىز سۋ تاپشىلىعى قاتتى سەزىلەدى. ءۇش قالاعا جانە ورتالىق قۇبىر جەلىسى بار 59 ەلدى مەكەنگە اۋىز سۋ بەلگىلى ءبىر ۋاقىتتا عانا بەرىلەدى. سۋ تاپشىلىعى – كۇنىنە 23 مىڭ تەكشە مەتر.
قازىر سۋ تۇشىتاتىن 6 زاۋىت پەن قوندىرعى سالىنىپ جاتىر. كەندىرلىدەگى جوبا ىسكە قوسىلعان سوڭ, جاڭاوزەن قالاسىنىڭ, تەڭگە, قىزىلساي, راحات جانە كەندىرلى اۋىلدىق وكرۋگتەرىنىڭ تۇرعىندارىن تازا سۋمەن قامتاماسىز ەتۋگە مۇمكىندىك تۋادى. سونداي-اق قوسىمشا جۇمىس ورىندارى اشىلادى. بۇل جوبانى كەشىكتىرمەي, دەر كەزىندە, ياعني, مامىر ايىندا اياقتاۋ كەرەك», دەيدى پرەزيدەنت.
2023 جىلى «استراحان – ماڭعىشلاق» ماگيسترالدى سۋ قۇبىرى جاڭعىرتىلدى. ونىڭ سۋ وتكىزۋ مۇمكىندىگى كۇنىنە 110 مىڭنان 170 مىڭ تەكشە مەترگە دەيىن ارتتى. بىراق بۇل قۇبىر باتىس ايماقتىڭ سۋعا سۇرانىسىن تولىق وتەي المايدى. ونىڭ ۇستىنە, قۇبىر ارقىلى كەلەتىن سۋدى ابدەن تازارتۋ كەرەك. سوندىقتان سۋدىڭ وزىندىك قۇنى قىمباتقا تۇسەدى. ۇكىمەت «سامۇرىق-قازىنا» قورىمەن بىرگە وسى ايماقتاعى سۋ تاپشىلىعىن ازايتۋ ءۇشىن ناقتى شەشىم قابىلداۋعا ءتيىس.