الماتىدا «مي قۇپيالارى. كوپسالالى فورۋم» حالىقارالىق جيىنى اياقتالدى

القالى جيىندى «ازيالىق جۇرەك پەن مي قوعامى» قوعامدىق بىرلەستىگى, الماتى قالالىق جەدەل شۇعىل كومەك كورسەتۋ اۋرۋحاناسى مەن ينسۋلت ماسەلەلەرى جونىندەگى رەسپۋبليكالىق ۇيلەستىرۋ ورتالىعى بىرلەسىپ ۇيىمداستىردى.

نەۆرولوگيالىق اۋرۋلاردى دياگنوستيكالاۋ, ەمدەۋ جانە وڭالتۋ ماسەلەلەرىن پانارالىق تۇرعىدان تالقىلاۋدى ماقسات تۇتقان فورۋمعا قازاقستان, رەسەي, ۋكراينا مەن اقش ەلدەرىنەن كەلگەن 300-گە جۋىق مامان – نەۆرولوگتار, كارديولوگتار, پسيحياترلار, تەراپەۆتەر مەن وڭالتۋشى دارىگەرلەر قاتىستى.

الماتى قالالىق جەدەل شۇعىل كومەك كورسەتۋ اۋرۋحاناسىنىڭ ديرەكتورى, مەديتسينا عىلىمدارىنىڭ كانديداتى, قاۋىمداستىرىلعان پروفەسسور الماز دجۋۆاشەۆ كونفەرەنتسيانى اشىپ, نەۆرولوگيا سالاسىندا مۋلتيديستسيپلينارلىق كوزقاراستىڭ ماڭىزدىلىعىنا توقتالا وتىرىپ: مەديتسينا دامىپ, جاڭا دياگنوستيكالىق جانە ەمدەۋ ادىستەرى ەنگىزىلگەنىنە قاراماستان, اتالعان اۋرۋلاردىڭ بەلەڭ الىپ كەلە جاتقانى بايقالادى. ماسەلەن, قازاقستاندا جىل سايىن 42 مىڭنان استام جاڭا ينسۋلت جاعدايى تىركەلەدى. وكىنىشكە قاراي, بۇل كورسەتكىش تەك ءوسىپ قانا قويماي, ونىڭ ۇستىنە اۋرۋ «جاسارىپ» بارادى. بۇرىن ينسۋلت جاسى كەلگەن ادامداردىڭ عانا دەرتى سانالىپ كەلسە, بۇگىندە ول 40 جاسقا دەيىنگى ازاماتتار اراسىندا دا كەزدەسىپ وتىر.

ءبىزدىڭ كلينيكا ۇجىمىنىڭ ۇيلەسىمدى جۇمىسىنىڭ, جاڭا ەمدەۋ تاسىلدەرى مەن ادىستەرىنىڭ ەنگىزىلۋىنىڭ ارقاسىندا جالپى ءولىم-ءجىتىمدى 13,3%-عا تومەندەتۋگە قول جەتكىزدىك. بمق (باس-مي قاناينالىمى) بويىنشا ءولىم-ءجىتىم 29%-عا, ينسۋلت بويىنشا – 23%-عا ازايىپ, 4,7%-دى قۇرادى. بۇل – ەلىمىز بويىنشا ورتاشا كورسەتكىشتەن تومەن», دەدى

فورۋم باعدارلاماسىندا جەتەكشى ساراپشىلاردىڭ باياندامالارى ۇسىنىلدى. ولاردىڭ قاتارىندا قر دەنساۋلىق ساقتاۋ مينيسترلىگىنىڭ باس نەۆرولوگى, پروفەسسور ساۋلە تۋرۋسپەكوۆا, قازۇمۋ پروفەسسورى ەركىن نۇرعوجاەۆ, وكلاحوما ۋنيۆەرسيتەتىنىڭ (اقش) پروفەسسورى ەۆگەني سيدوروۆ, رەسەيدىڭ «دالەلدى نەۆرولوگيا قوعامىنىڭ» پرەزيدەنتى ولەگ ۆينوگرادوۆ, سونداي-اق ۋكراينادان كەلگەن پروفەسسور مارينا ترەششينسكايا بار.

الماتى قالالىق جەدەل شۇعىل كومەك كورسەتۋ اۋرۋحاناسى اتىنان ءينسۋلتتى ديففەرەنتسيالدى دياگنوستيكالاۋ سەكتسياسىندا جوعارى ساناتتى نەۆرولوگ جانە قوعامدىق دەنساۋلىق ساقتاۋ ماگيسترى ءلاززات اياعانوۆا بايانداما جاساپ, كرەيتتسفەلدت-ياكوب اۋرۋىنىڭ ينسۋلتكە ۇقساس كلينيكالىق جاعدايىن مىسال رەتىندە ۇسىندى.

قاتىسۋشىلار اراسىندا تامىرلىق كوگنيتيۆتى جەتكىلىكسىزدىك, پسەۆدوينسۋلتتىك جاعدايلار, سوماتوفورمالىق بۇزىلىستار تاقىرىپتارى مەن زاماناۋي نەيرووڭالتۋ ادىستەرى ەرەكشە قىزىعۋشىلىق تۋعىزدى.

كونفەرەنتسيا مەديتسينالىق قاۋىمداستىق ءۇشىن ماڭىزدى شاراعا اينالىپ, مي اۋرۋلارىنا كەشەندى قاراۋدىڭ ماڭىزىن ايقىن كورسەتتى.