بۇگىن II ورتالىق ازيا مەديافورۋمى اياسىندا مادەنيەت جانە اقپارات ءمينيسترى ايدا بالاەۆا ورتالىق ازيا ەلدەرىنىڭ مەديا سالاسى مەكەمەلەرى مەن سالالىق ۆەدومستۆولارىنىڭ وكىلدەرىمەن بىرقاتار ەكىجاقتى كەزدەسۋلەر وتكىزدى, دەپ حابارلايدى Egemen.kz سالا مينيسترلىگىنىڭ ءباسپاسوز قىزمەتىنە سىلتەمە جاساپ.
ايدا بالاەۆا وزبەكستان رەسپۋبليكاسى پرەزيدەنتى اكىمشىلىگىنىڭ جانىنداعى اقپارات جانە بۇقارالىق كوممۋنيكاتسيالار اگەنتتىگىنىڭ ديرەكتورى اسادجون حودجاەۆپەن كەزدەسىپ, قازاقستاننىڭ ورتالىق ازيا وڭىرىندە بىرىڭعاي اقپاراتتىق كەڭىستىكتى نىعايتۋدى ۇنەمى قولدايتىنىن اتاپ ءوتتى. تاراپتار اراسىنداعى ىنتىماقتاستىقتى كەڭەيتۋ جانە ءوزارا تاجىريبەلىك بايلانىستى دامىتۋ ماقساتىندا اقپاراتتىق سالاداعى ارىپتەستىكتى نىعايتۋعا باعىتتالعان بىرلەسكەن حاتتاماعا قول قويىلدى.
ازەربايجان رەسپۋبليكاسىنىڭ مەديا دامىتۋ اگەنتتىگىنىڭ اتقارۋشى ديرەكتورى احمەد يسمايلوۆپەن وتكەن كەلىسسوزدەر بارىسىندا تاراپتار حالىقتار اراسىنداعى جاقىنداسۋ مەن ورتاق اقپاراتتىق كەڭىستىك قالىپتاستىرۋدا مادەنيەت, ءبىلىم بەرۋ مەن مەديانىڭ ماڭىزدى ءرولىن اتاپ ءوتتى. اسىرەسە, تەڭ دارەجەلى اقپارات تاراتۋ ماسەلەسىنە ەرەكشە نازار اۋدارىلدى. قازىرگى ۋاقىتتا قازاقستان رەسپۋبليكاسىنىڭ مادەنيەت جانە اقپارات مينيسترلىگى ازەربايجاننىڭ «CBC TV» تەلەارناسىن ەلىمىزدىڭ اۋماعىندا تىركەۋ مۇمكىندىگىن قاراستىرىپ جاتىر.
سونداي-اق ايدا بالاەۆا CNN-ءنىڭ ورتالىق ازيا جانە افريكا بويىنشا وكىلى سايەد يمران احمادپەن كەزدەستى. تاراپتار تەلەجۋرناليستيكا مەن مەديا سالاسىن دامىتۋعا باعىتتالعان ەكىجاقتى ىنتىماقتاستىقتى كەڭەيتۋ جوسپارلارى مەن پەرسپەكتيۆالارىن تالقىلادى.