جىل باسىنان بەرى رەسپۋبليكالىق بيۋدجەتتەن ەل ازاماتتارىنا 1 ترلن 44,3 ملرد تەڭگەگە زەينەتاقى تولەنگەن, دەپ حابارلايدى Egemen.kz ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتىنە سىلتەمە جاساپ.
بازالىق زەينەتاقى تولەۋگە – 337,6 ملرد تەڭگە, ىنتىماقتى زەينەتاقى تولەۋگە – 706,7 ملرد تەڭگە جۇمسالعان.
مينيسترلىكتىڭ مالىمەتىنشە, 2025 جىلعى 1 ساۋىردەگى جاعداي بويىنشا زەينەتكەرلەر سانى – 2 ملن 465 مىڭ ادامدى قۇراعان.
«2025 جىلعى 1 ساۋىردەگى جاعداي بويىنشا جيىنتىق زەينەتاقىنىڭ ورتاشا مولشەرى 143 622 تەڭگەنى قۇرادى, ونىڭ ىشىندە ىنتىماقتى زەينەتاقى مولشەرى – 95 963 تەڭگە, بازالىق زەينەتاقى – 47 659 تەڭگە بولدى», دەلىنگەن حابارلامادا.
بۇدان بۇرىن حابارلانعانداي, بيىل 1 قاڭتاردا بازالىق زەينەتاقى تولەمىنىڭ مولشەرى قر ۇلتتىق بانكى ايقىندايتىن ينفلياتسيانىڭ بولجامدى دەڭگەيىنە سايكەس 6,5%-عا, ىنتىماقتى زەينەتاقى 8,5%-عا, ياعني ينفلياتسيا دەڭگەيىنەن 2% - عا وزا وتىرىپ ۇلعايتىلعان.
ەستەرىڭىزگە سالا كەتەيىك, 2018 جىلعى 1 شىلدەدەن باستاپ مەملەكەتتىك بازالىق زەينەتاقى تولەمى زەينەتاقى جۇيەسىندەگى ءوتىلىن ەسكەرە وتىرىپ, ءار الۋشىعا جەكە تاعايىندالادى.