الماتىدا وتكەن شاحماتتان ازيا چەمپيوناتىندا ەلوردالىق مەكتەپتىڭ 10 سىنىپ وقۋشىسى ۇزدىك ناتيجە كورسەتتى. تەمىربەك جۇرگەنوۆ اتىنداعى № 70 مەكتەپ-ليتسەيدىڭ اتىنان قاتىسقان اڭسات الديار التىن مەدال جەڭىپ الىپ, ءۇندىستان استاناسىندا وتەتىن الەم چەمپيوناتىنا جولداما الدى, دەپ حابارلايدى Egemen.kz.
جارىسقا وزبەكستان, تۇرىكمەنستان, تاجىكستان, قىرعىزستان, اۋعانستان جانە قازاقستاننىڭ ەڭ مىقتى جاس شاحماتشىلارى قاتىستى. ەلەۋلى باسەكەلەستىككە قاراماستان, استانالىق 15 جاسار وقۋشى ورتالىق ازيانىڭ ەڭ زياتتى شاحماتشىلارىنىڭ ءبىرى ەكەنىن دالەلدەپ, ءتۋرنيردىڭ ءابسوليۋتتى جەڭىمپازى اتاندى.
بۇل اڭساتتىڭ العاشقى حالىقارالىق جەتىستىگى ەمەس. بۇعان دەيىن ول ازيا جانە الەم چەمپيوناتتارىنىڭ جۇلدەگەرى اتانىپ جۇرگەن ەدى.