مەملەكەت باسشىسىنىڭ تاپسىرماسى بويىنشا ەلىمىزدە ەنەرگەتيكا سالاسىن دامىتۋ شارالارى جۇزەگە اسىرىلىپ كەلەدى. اتالعان تاپسىرمانى ورىنداۋ اياسىندا 2024-2025 جىلدارداعى كۇزگى-قىسقى كەزەڭ اياقتالدى, سونداي-اق ينفراقۇرىلىمدى اۋقىمدى جاڭارتۋعا جانە «جاسىل» ەنەرگەتيكانى دامىتۋعا دايىندىق جۇمىستارى باستالدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
مالىمەتتەرگە سۇيەنسەك, كۇزگى-قىسقى ماۋسىمنىڭ جىلۋمەن قامتۋدا ىركىلىستەرسىز ءوتۋى ۇكىمەت قابىلداعان شارالاردىڭ تيىمدىلىگىن كورسەتكەن. اۋقىمدى دايىندىق جۇمىستارى جۇرگىزىلگەن: 10 ەنەرگيا بلوگىنا, 55 قازاندىققا جانە 45 تۋربيناعا كۇردەلى جوندەۋ جۇمىستارى جۇرگىزىلدى, بۇل جەو مەن جىلۋ جەلىلەرىندەگى جوعارى توزۋدى ازايتۋ ۇدەرىسىن باستاۋعا مۇمكىندىك بەردى.
«قابىلدانعان شارالار ەلەكتر ستانسالارىنداعى تەحنولوگيالىق بۇزۋشىلىقتار سانىن 27%-عا (1070-تەن 782-كە دەيىن), ال تەمپەراتۋرالىق كەستەنى ساقتاماۋ جاعدايلارىن 67%-عا (215-تەن 65-كە دەيىن) تومەندەتۋگە مۇمكىندىك بەردى. ماڭىزدى جەتىستىك رەتىندە 12 جەو جاعدايىنىڭ جاقسارۋىن اتاپ وتۋگە بولادى: ونىڭ 9-ى «قىزىل» ايماقتان «سارى» ايماققا, ال 3-ءۋى «سارى» ايماقتان «جاسىل» ايماققا ءوتتى. ناتيجەسىندە, «قىزىل» ايماقتا 10 جەو (بۇرىن 19), «سارى» ايماقتا 17 جەو (بۇرىن 11), «جاسىل» ايماقتا 10 جەو (بۇرىن 7) قالدى. كورسەتكىشتەرىن جاقسارتقاندار قاتارىندا ەكىباستۇز, وسكەمەن, جەزقازعان, بالقاش, اتىراۋ, ريددەر, كەنتاۋ جانە باسقا دا ستانسالار بار. ايرىقشا نازار «ماەك» جشس, اقتاۋ جىلۋ جەلىلەرىنە جانە ستەپنوگورسك, تەمىرتاۋ جەو جۇمىسىنا اۋدارىلدى», دەلىنگەن حابارلامادا.
سونىمەن قاتار 2024 جىلى ەكىباستۇز 1-گرەس-ءتى قالپىنا كەلتىرگەن بلوگىن (500 مۆت), اتىراۋ جەو جاڭا تۋربيناسىن (65 مۆت) جانە جەزقازعانداعى (+43 مۆت) جاڭارتىلعان قازاندىقتى قوسا العاندا, 771 مۆت جاڭا قۋات ەنگىزىلگەن. سونداي-اق جالپى قۋاتى 163,35 مۆت بولاتىن جاڭارتىلاتىن ەنەرگيا كوزدەرى بويىنشا جوبالار ىسكە قوسىلعان.
ەنەرگەتيكا مينيسترلىگى ەلەكتر ەنەرگياسى ءۇشىن شەكتى تاريفتەردى قايتا قاراپ, ەلەكتر قۋاتى نارىعىنداعى شەكتى تاريف ارتتىرىلعان. قايتارىلاتىن ينۆەستيتسيالاردىڭ جىلدىق ءليميتى ۇلعايتىلعان. 2024 جىلى قابىلدانعان شارالار جوندەۋ جۇمىستارىن قارجىلاندىرۋدى بىلتىرعى دەڭگەيمەن سالىستىرعاندا 44%-عا ۇلعايتىپ, 327 ملرد تەڭگەگە جەتكىزۋگە مۇمكىندىك بەردى.
ايتا كەتەيىك, كەلەسى جىلىتۋ ماۋسىمىنا دايىندىق جۇمىستارى باستالىپ كەتكەن.
«اتالعان جۇمىستار اياسىندا 10 ەنەرگەتيكالىق بلوك, 63 قازاندىق جانە 39 تۋربينانى جوندەۋ جۇمىستارى جوسپارلانعان, كەيبىر جۇمىستار قازىردىڭ وزىندە ءجۇرىپ جاتىر. ورتالىقتاندىرىلعان جىلۋمەن قامتۋ ايماعىنداعى 66 جىلۋ ورتالىعىندا 53 قازاندىقتى جوندەۋ جانە رەكونسترۋكتسيالاۋ جۇمىستارى جوسپارلانعان. كۇن جىلىنعان سوڭ 17 مىڭ شاقىرىم ەلەكتر جەلىسى مەن 323 شاقىرىم جىلۋ قۇبىرىن جاڭارتۋ جۇمىستارى باستالادى», دەپ حابارلادى ۇكىمەتتىڭ ءباسپاسوز قىزمەتى.
ۇلتتىق ەنەرگەتيكانى جاڭعىرتۋ ۇلتتىق جوباسى اياسىندا جالپى بيۋدجەتى 4 ترلن تەڭگە بولاتىن 77,5 مىڭ شاقىرىم ەلەكتر جەلىلەرى مەن 1,6 مىڭ شاقىرىم جىلۋ جەلىلەرى جاڭارتىلادى.
«2029 جىلعا دەيىن بۇل ەلەكتر جەلىلەرىنىڭ توزۋىن 45%-عا, جىلۋ جەلىلەرىنىڭ توزۋىن 42%-عا تومەندەتۋگە مۇمكىندىك بەرەدى. گەنەراتسيا سالاسىندا 7,3 گۆت جاڭا قۋات ەنگىزۋ, ونىڭ ىشىندە قولدانىستاعى ستانسالاردى جاڭارتۋ جانە جاڭا ستانسالار سالۋ جوسپارلانۋدا. 2029 جىلعا دەيىن 29 جوبانى اياقتاۋ جوسپارلانعان, بۇل ەلەكتر ستانسالارىنىڭ ورتاشا توزۋىن 40%-عا دەيىن تومەندەتۋگە مۇمكىندىك بەرەدى. جاڭارتىلاتىن ەنەرگيا كوزدەرىن دامىتۋ دا باسىم باعىت بولىپ قالا بەرەدى: 2024 جىلى 153 نىسان 7,58 ملرد كۆت·ساع نەمەسە جالپى ءوندىرىستىڭ 6,43%-ى ءوندىردى. 8 جاڭا ستانسا (163,35 مۆت) ىسكە قوسىلدى, ال 2025 جىلدىڭ سوڭىنا دەيىن تاعى 9 جەك جوباسى (455,5 مۆت) ىسكە قوسىلادى. قازىردىڭ وزىندە بيىلعى جىلدىڭ اقپان ايىندا قاراعاندى وبلىسىندا «گيپەربورەيا» جشس-مەن قۋاتى 50 مۆت جەل ەلەكتر ستانساسى ىسكە قوسىلدى», دەلىنگەن حابارلامادا.