قازىرگى ۋاقىتتا رەزەرۆات اۋماعىندا ماڭىزدى اگروتەحنيكالىق كەزەڭ – وتىرعىزۋ ماتەريالىن دايىندالعان جەر تەلىمدەرىنە كوشىرۋ جۇرگىزىلىپ جاتىر, دەپ حابارلايدى Egemen.kz.
مەملەكەت باسشىسىنىڭ ەلىمىزدى جاپپاي كوگالداندىرۋ جونىندەگى تاپسىرماسى اياسىندا 2 ميلليارد اعاش وتىرعىزۋ جوسپارلانعان. بۇل يگى باستاماعا «ەرتىس ورمانى» مەملەكەتتىك ورمان تابيعي رەزەرۆاتى ءوز ۇلەسىن قوسۋدا.
- ءبىز جىل سايىن 12 ميلليوننان استام كادىمگى قاراعاي كوشەتىن وتىرعىزامىز. بيىلعى جىلى دا بۇل جۇمىس قارقىندى جالعاسۋدا. ەكى جىلدىق كوشەتتەردى قازىپ الۋ - ورماندى قالپىنا كەلتىرۋ شارالارىنىڭ ەڭ جاۋاپتى ساتتەرىنىڭ ءبىرى. كوشەتتەر بەرىك تامىر جۇيەسىمەن, ساپاسىنا قاراي ىرىكتەلەدى. ودان سوڭ جازىق ۋچاسكەلەردە مەحانيكالاندىرىلعان ءادىس قولدانىلادى. بۇل ەڭبەك ونىمدىلىگىن ارتتىرادى. تەحنيكانىڭ كىرۋى قيىن جەرلەردە قولمەن وتىرعىزىلادى. كوشەت تامىرلارى تىك ورنالاسىپ, توپىراق مىقتاپ تىعىزدالادى. قازاق ورمان ورنالاستىرۋ كاسىپورىنىنىڭ جوباسىنا سايكەس, «ەرتىس ورمانى» رەزەرۆاتىندا اعاش وتىرعىزۋ كولەمى 2114,5 گەكتاردى قۇراۋى ءتيىس ەدى. دەگەنمەن, 2024 جىلى بەكىتىلگەن «تازا قازاقستان» تۇجىرىمداماسىنا سايكەس, بۇل كولەم 2500 گەكتارعا دەيىن ۇلعايتىلدى,-دەپ حابارلادى رەزەرۆاتتىڭ ءباسپاسوز قىزمەتىنەن.
بۇعان قوسا ەكولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ قولداۋىمەن «ەرتىس ورمانى» زاماناۋي ءورت ءسوندىرۋ جابدىقتارىمەن تولىق جاراقتالعان ارنايى تەحنيكالارمەن قامتاماسىز ەتىلىپ جاتىر. جۋىقتا اۆتوپارك 34 بىرلىك شاعىن ءورت ءسوندىرۋ كەشەندەرىمەن جانە 15 تراكتورمەن تولىقتى. بۇل تەحنيكالار ورمان ورتتەرىنىڭ الدىن الۋ, پاترۋلدىك باقىلاۋ, مونيتورينگ جۇرگىزۋ جانە توتەنشە جاعدايلارعا جەدەل ارەكەت ەتۋ جۇمىستارىن ءتيىمدى جۇزەگە اسىرۋعا مۇمكىندىك بەرەدى. بيىل قوسىمشا 34 بىرلىك اتس-3 ماركالى ءورت ءسوندىرۋ ماشينالارىن ساتىپ الۋ جوسپارلانعان.
پاۆلودار وبلىسى