زارداپ شەككەن بالا وبلىستىق بالالار اۋرۋحاناسىنىڭ جانساقتاۋ بولىمىنە جاتقىزىلدى. جاعدايى اۋىر, ءبىرىنشى دارەجەلى كوماعا تۇسكەن, دەپ حابارلايدى Egemen.kz.
پاۆلوداردا ەكى جاسار ەر بالا بەسىنشى قاباتتاعى تەرەزەدەن قۇلاپ كەتتى. جازاتايىم وقيعا اجەسىنىڭ ۇيىندە بولعانى انىقتالدى.
بۇل تۋرالى بالا قۇقىقتارى جونىندەگى وڭىرلىك ۋاكىل ساۋلە شاكەنوۆا حابارلادى.
- بۇگىن 2 جاسار بالا اجەسىنىڭ ۇيىندە قوناقتا بولعان ۋاقىتىندا 5-قاباتتان قۇلاپ كەتكەن. زارداپ شەككەن جەتكىنشەك كوپتەگەن جاراقاتپەن, اۋىر جاعدايدا وبلىستىق بالالار اۋرۋحاناسىنىڭ جانساقتاۋ بولىمىنە جاتقىزىلدى. بۇل جىل باسىنان بالالاردىڭ بيىكتەن قۇلاۋى بويىنشا تىركەلگەن وبلىستاعى العاشقى وقيعا, - دەپ حابارلادى بالالار ومبۋدسمەنى.
وبلىستىق بالالار اۋرۋحاناسىنىڭ ءباسپاسوز قىزمەتى قابىلداۋ كەزىندە ەر بالانىڭ جاعدايى اۋىر, ءبىرىنشى دارەجەلى كوماعا تۇسكەنىن حابارلادى.
«بالادا ءتۇرلى جاراقات بار: جابىق باس ميىنىڭ جاراقاتى, ميدىڭ شايقالۋى, مي جاراقاتى. سونداي-اق, وكپە كونتۋزياسى, ءىش قۇرىلىسىنىڭ جاراقاتى تىركەلدى. قازىرگى ۋاقىتتا مي, مويىن, كەۋدە قۋىسى, ءىش قۋىسى جامباسىن قامتي وتىرىپ كومپيۋتەرلىك توموگرافيا جاسالدى. بالانى تەكسەرۋ ءالى دە جالعاسۋدا», - دەپ مالىمدەدى بالالار اۋرۋحاناسىنان.
پاۆلودار وبلىسى