ماڭعىستاۋ وبلىسىنداعى اقجىگىت اۋىلىندا 8 ساۋىردە قازا بولعان 17 جاستاعى ءجاسوسپىرىمنىڭ ولىمىنە قاتىستى تەرگەۋ امالدارى جۇرگىزىلىپ جاتىر, دەپ حابارلايدى Egemen.kz.
باسىلىمنىڭ جازۋىنشا, پوليتسيانىڭ ءجاسوسپىرىمنىڭ ولىمىنە سەبەپ بولعان كۇدىكتىنى كۇنى كەشە عانا ۇستاعانى بەلگىلى بولدى.
قايعىلى وقيعا ءساۋىردىڭ 8-ءى كۇنى بولعان. مارقۇمنىڭ تۋىستارىنا ونىڭ قۇلاپ, جاراقات العانىن, سونىڭ سالدارىنان قايتىس بولعانى ايتىلعان. الايدا ءجاسوسپرىمنىڭ وتباسى ونى زورلىق-زومبىلىق قۇربانى بولدى دەپ ەسەپتەيتىندىكتەن, ءادىل تەرگەۋدى تالاپ ەتىپ وتىر.
ماڭعىستاۋ پوليتسيا دەپارتامەنتى ءباسپاسوز قىزمەتىنىڭ مالىمەتىنشە, كۇدىكتى – سول اۋىلدىڭ 20 جاستاعى تۇرعىنى.
«بۇعان دەيىن كۇدىكتىگە ىزدەۋ جاريالانعان بولاتىن, حابارلاما وبلىستىڭ بارلىق اۋدانىنا تاراتىلعان. قازىر ول ۇستالىپ, ۋاقىتشا ۇستاۋ يزولياتورىنا قامالدى. تەرگەۋ قر قىلمىستىق كودەكسىنىڭ 106-بابىنىڭ 3-بولىگى «دەنساۋلىققا قاساقانا اۋىر زيان كەلتىرۋ, جابىرلەنۋشىنىڭ ولىمىنە اكەپ سوعۋ» بويىنشا جۇرگىزىلۋدە», - دەلىنگەن حابارلامادا.
قىلمىستىڭ سارالانۋى وزگەرمەسە, جاس جىگىت 8 جىلدان 12 جىلعا دەيىن باس بوستاندىعىنان ايىرىلۋى مۇمكىن.
وقيعانىڭ ءمان-جايىن تەرگەۋشىلەر مۇقيات زەرتتەپ جاتىر.