جاقىندا ۇلتتىق اكادەميالىق كىتاپحانا مەن يۋنۋس ەمرە ينستيتۋتىنىڭ استانا تۇرىك مادەني ورتالىعى بىرىگىپ, اققان جۇلدىزداي وتە شىققان اقىن ءامىرحان بالقىبەك پەن تۇرىك اقىنى فارۋك نافىز چاملىبەلدى ەسكە الۋعا ارنالعان پوەزيا كەشىن وتكىزدى.
ادەبي كەش يۋنۋس ەمرە اتىنداعى تۇرىك مادەني ورتالىعىنىڭ ديرەكتورى يبراگيم يىلدىرىمنىڭ العى سوزىمەن اشىلدى.«وسمان يمپەرياسى كەزىندە تۇرىكتەر وزدەرىن تۇرىك دەپ ايتپادى. يمپەريانىڭ قۇرامىنداعى بارلىق حالىقتار وزدەرىن «وسماندىقتار» دەپ اتادى. تۇرىك ءسوزى اۋىلدىق جەرلەردە تۇراتىن حالىقتىڭ اتاۋى ءتارىزدى ەدى. «تۇرىك» ءسوزىن العاش رەت ادەبيەتتە قولدانعان نافىز چاملىبەل بولاتىن. اقىننىڭ ەرەكشەلىگى دە وسى بولاتىن. وسمان يمپەرياسىنداعى بارلىق حالىق ىستامبۇل حالقىنا قاراپ بوي تۇزەيتىن. بۇل ءۇردىستى دە تەرىسكە شىعارعان اقىن نافىز چاملىبەل ەدى. وسمان قۇرامىنداعى وزگە جەرلەردىڭ مادەنيەتى مەن داستۇرلەرىندەگى ەرەكشەلىكتەردى تەرەڭ مەڭگەرگەن اقىن ونى ءوزىنىڭ جىرلارىنا ارقاۋ ەتتى. حالىق سول ولەڭدەر ارقىلى وزگە ايماقتاردىڭ مادەنيەتىمەن تانىستى. اقىن نافىز چاملىبەلدى قازاق حالقىنا العاش رەت تانىستىرعان ءامىرحان بالقىبەك بولاتىن. ءامىرحان بالقىبەك نافىز چاملىبەلدىڭ ولەڭدەرىن اۋدارىپ, قازاق پەن تۇرىك حالىقتارىنىڭ ىنتىماعىنا زور ۇلەس قوستى. ونىڭ بۇل ەڭبەگىن جوعارى باعالايمىز», – دەدى يبراگيم يىلدىرىم.
تۇرىك جازۋشىلارىنىڭ كوپتەگەن شىعارمالارىن قازاق تىلىنە اۋدارعان اقىن مارجان ەرشۋ دا ءوز سوزىندە ەكى ەلدىڭ اراسىنداعى مادەني بايلانىستاردىڭ ودان ءارى نىعايا تۇسەتىندىگىنە سەنىم ءبىلدىردى.«قازاق حالقى مەن تۇرىك حالقىنىڭ مادەني بايلانىستارىنىڭ ارتا تۇسۋىنە استاناداعى يۋنۋس ەمرە اتىنداعى تۇرىك مادەني ورتالىعى كوپ ەڭبەك ءسىڭىرىپ كەلەدى. تۇرىك اقىنى نافىز چاملىبەل مەن قازاق اقىنى ءامىرحان بالقىبەكتى ەسكە الۋعا ارنالعان كەش وسىنىڭ ايعاعى. الداعى ۋاقىتتا ءامىرحان بالقىبەكتىڭ بۇل باستاماسىن قازاق پەن تۇرىكتىڭ وزگە اقىندارى جالعاستىرا تۇسەرى انىق. ەكى ەلدىڭ اراسىنداعى مادەني بايلانىستار ودان ءارى دامي تۇسەتىنىنە سەنىمدىمىن», – دەدى اقىن قىز.
مادەني ورتالىقتىڭ ديرەكتورى يبراگيم يىلدىرىم قازاق اقىنى ءامىرحان بالقىبەكتىڭ شىعارماشىلىعىن جوعارى باعالايتىندىعىن ايتىپ, اقىننىڭ وتباسىنا ارنايى قۇرمەت گراموتاسىن تاپسىردى.
ادەبي كەشكە جينالعان كوپشىلىك قاۋىم ءامىرحان بالقىبەك پەن نافىز چاملىبەلدىڭ ولەڭدەرىن وقىپ, ءوزارا پىكىر الماسىپ تارقاستى.
نۇرسەرىك جولبارىس.