مەملەكەت باسشىسىنىڭ تاپسىرمالارىن جۇزەگە اسىرۋ شەڭبەرىندە ۇكىمەت اۋىل شارۋاشىلىعى تاۋارىن وندىرۋشىلەردى قولداۋ ءۇشىن رەزەرۆتەن 40 ملرد تەڭگە ءبولدى. ءتيىستى قاۋلىعا پرەمەر-مينيستر ولجاس بەكتەنوۆ قول قويدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
قاراجاتتى كوكتەمگى ەگىس جۇمىستارىنىڭ ساپالى جۇرگىزىلۋىن قامتاماسىز ەتۋ, 2025 جىلدىڭ ءونىمىن قابىلداۋ ءۇشىن استىق قويمالارىن بوساتۋ, قازاقستاندىق استىق ەكسپورتىنىڭ باسەكەگە قابىلەتتىلىگىن ارتتىرۋ, سونداي-اق جاڭا وتكىزۋ نارىقتارىن يگەرۋ سياقتى كەشەندى مىندەتتەردى شەشۋگە باعىتتاۋ جوسپارلانعان.
«وزدەرىڭىزگە بەلگىلى, 2024 جىلى ەلىمىزدە ءداندى داقىلدار بويىنشا 25,2 ملن توننا كولەمىندە رەكوردتىق ءونىمى جينالدى. جوعارى ونىمدىلىككە اگروتەحنولوگيانى دۇرىس قولدانۋ ناتيجەسىندە جانە قولايلى اۋا رايىنىڭ ارقاسىندا قول جەتكىزىلدى. سونىمەن قاتار ىشكى نارىق سۇرانىسى شامامەن 10 ملن توننانى قۇرايدى», دەلىنگەن حابارلامادا.
مەملەكەت باسشىسى قاسىم-جومارت توقاەۆ 2024 جىلى اۋىل شارۋاشىلىعى ەڭبەككەرلەرىنىڭ ءبىرىنشى فورۋمىندا اتاپ وتكەندەي, قازاقستاننىڭ ءداندى داقىلدار بويىنشا ەكسپورتتىق الەۋەتى 12 ملن توننانى قۇراعان.
«بۇل – اۋقىمدى كولەم جانە ۇلكەن جاۋاپكەرشىلىك. ۇكىمەتتىڭ باستى مىندەتى – شارۋالارعا ءوز ونىمدەرىن شەتەلدىك نارىقتاردا وتكىزۋدە جان-جاقتى قولداۋ كورسەتۋ. بۇگىندە بۇل ەكسپورتتىق الەۋەتتىڭ 10 ملن تونناسى باعىتتارى ازىرلەنگەن ءداستۇرلى وتكىزۋ نارىقتارىنا, ال 2 ملن تونناسى الىس باعىتتار مەن جاڭا نارىقتاردا ساتۋ ءۇشىن جونەلتىلدى», دەپ حابارلادى ۇكىمەتتىڭ ءباسپاسوز قىزمەتى.
وسىلايشا, تاسىمالداۋ شىعىندارىن ازايتۋدى سۋبسيديالاۋ شارۋالارعا استىقتى جاڭا نارىقتارعا دەر كەزىندە ەكسپورتتاۋعا جانە استىق قويمالارىن جاڭا ونىمگە دايىنداۋعا مۇمكىندىك بەرەدى.
ەستەرىڭىزگە سالا كەتەيىك, سوڭعى دەرەكتەر بويىنشا 2024 جىلدىڭ قىركۇيەگىنەن ءساۋىر ايىنا دەيىن استىق ەكسپورتى 6,9 ملن توننانى قۇراعان, ول 2023-2024 جىلداردىڭ ۇقساس كەزەڭىنەن 54%-عا كوپ.
بۇگىندە ەكسپورتتىڭ ءداستۇرلى باعىتتارى – وزبەكستان, تاجىكستان, قىرعىزستان, اۋعانستان. يران مەن ازەربايجانعا جەتكىزۋ كولەمى ۇلعايعان. ترانزيتتىك جولدار رەسەي, لاتۆيا, ليتۆا, ەستونيا, ازەربايجان, گرۋزيا, تۇركىمەنستان جانە قىتاي اۋماقتارى ارقىلى وتەدى.