اقش پرەزيدەنتى دونالد ترامپ يراننىڭ اتوم بومباسىن جاساۋىنا جول بەرمەۋ ماقساتىندا ەكى ەل اراسىندا تىكەلەي كەلىسسوزدەر باستالعانىن مالىمدەدى, دەپ حابارلايدى Egemen.kz The Guardian باسىلىمىنا سىلتەمە جاساپ.
اق ۇيدە يزرايل پرەمەر-ءمينيسترى بينيامين نەتانياحۋمەن كەزدەسۋ كەزىندە ترامپ كەلىسسوزدەردىڭ سەنبى كۇنى وتەتىنىن, بىراق ولاردىڭ شىن مانىندە الدەقاشان باستالىپ كەتكەنىن ايتقان.
ايتا كەتەيىك, اقش پرەزيدەنتى كەلىسسوزدەردىڭ قايدا وتەتىنىن جانە كىمدەردىڭ قاتىساتىنىن ناقتىلاماعان.
«ەگەر يرانمەن كەلىسسوزدەر ءساتسىز اياقتالسا يران ۇلكەن قاۋىپكە تاپ بولادى. مۇنى ايتۋ ماعان ۇنامايدى, بىراق ولاردىڭ يادرولىق قارۋعا يە بولۋىنا جول بەرىلمەيدى», دەدى دونالد ترامپ.
يزرايل پرەمەر-ءمينيسترى بينيامين نەتانياحۋ يراندى يزرايل ءۇشىن ەكزيستەنتسيالدى قاۋىپ دەپ ەسەپتەيدى جانە يادرولىق قارۋ جاساۋعا جول اشۋى مۇمكىن كەز كەلگەن كەلىسىمگە قارسى ەكەنىن ءبىلدىرىپ كەلەدى.