جۋىردا وڭىرلىك كوممۋنيكاتسيالار قىزمەتىندە وتكەن بريفينگتە قالالىق قورعانىس ىستەرى جونىندەگى دەپارتامەنت باستىعى, پولكوۆنيك ابدىعابيت شەگەباەۆ شىمكەنتتە كوكتەمگى اسكەرگە شاقىرۋ ناۋقانى باستالعانىن حابارلادى.
شاھاردا جىگىتتەردى وتان الدىنداعى اسكەري مىندەتىن وتەپ قايتۋعا شاقىرۋ ناۋقانى 1 ناۋرىزدان باستالدى. وسىعان بايلانىستى كوكتەمنىڭ العاشقى كۇنىنەن باستاپ 18 بەن 27 جاس ارالىعىنداعى ازاماتتار تۇرعىلىقتى جەرى بويىنشا جەرگىلىكتى اسكەري باسقارۋ ورگاندارىندا مەديتسينالىق كوميسسيادان, پسيحولوگيالىق تەستتەر مەن جەكە اڭگىمەلەسۋدەن ءوتىپ جاتىر. كوكتەمگى اسكەري شاقىرۋ بارىسىندا شىمكەنتتىڭ مىڭنان اسا ازاماتىن ساربازدار ساپىنا قوسۋ كوزدەلىپ وتىر.
ءبىرىنشى كەزەكتە جاۋىنگەرلىك مىندەتىنە جاڭا كىرىسكەن جىگىتتەرمەن ۇلتتىق قاۋىپسىزدىك كوميتەتى شەكارا قىزمەتىنىڭ, مەملەكەتتىك كۇزەت قىزمەتىنىڭ بولىمشەلەرى تولىقتىرىلادى. سودان كەيىن قارۋلى كۇشتەردىڭ, توتەنشە جاعدايلار مينيسترلىگىنىڭ جانە ىشكى ىستەر مينيسترلىگى ۇلتتىق ۇلاننىڭ اسكەري بولىمدەرى جاساقتالادى. بۇگىندە مەگاپوليستەن جۇزدەن اسا ازامات وتان الدىنداعى بورىشىن وتەۋ ءۇشىن شەكارا قىزمەتىنە اتتانعان. ولاردىڭ بارلىعى – شاقىرۋ كوميسسياسىنىڭ وتىرىسىنان ءوتىپ, وڭ قورىتىندى العاندار, ياعني اسكەرگە جارامدى جاندار.
قورعانىس ىستەرى جونىندەگى دەپارتامەنتىنىڭ باستىعى, پولكوۆنيك ءا.شەگەباەۆ اسكەرگە شاقىرۋدى جەرگىلىكتى اتقارۋشى ورگاندار ۇيىمداستىراتىنىن, ال شاقىرۋ كوميسسياسىن شىمكەنت قالاسى اكىمىنىڭ ورىنباسارى باسقاراتىنىن اتاپ ءوتتى.
«شاقىرۋ ناۋقانى بەكىتىلگەن كەستە بويىنشا ءوتىپ جاتىر. جىگىتتەردى اسكەرگە ءبولۋ ءتارتىبى مەديتسينالىق تەكسەرۋ ناتيجەسىنە, كاسىبي-پسيحولوگيالىق شاماسىنا, دەنساۋلىق جاعدايى مەن دايىندىق دەڭگەيىنە بايلانىستى ىسكە اسىرىلادى. سونىمەن قاتار ەلىمىزدىڭ زاڭناماسىنا سايكەس اسكەري قىزمەتىن وتەپ كەلگەن جاستار جوعارى وقۋ ورنىنا قۇجات تاپسىراردا قوسىمشا ارتىقشىلىقتارعا, سونىڭ ىشىندە ءبىلىم بەرۋ گرانتتارىنا يە بولا الادى», دەدى دەپارتامەنت باستىعى.
سونىمەن قاتار بريفينگ بارىسىندا پولكوۆنيك وتكەن جىلدىڭ قورىتىندىسىن جاريالادى. سوعان سايكەس بىلتىر شىمكەنتتەن قارۋلى كۇشتەرگە جانە باسقا دا اسكەرلەر مەن اسكەري قۇرالىمدارعا 2 مىڭنان اسا ادام جىبەرىلدى. دەپارتامەنت باستىعىنىڭ ايتۋىنشا, بىلتىرعى اسكەرگە شاقىرۋ ناۋقانى ءجۇز پايىزدىق مەجەدەن ارتىق ورىندالعان. ءوز كەزەگىندە پولكوۆنيك اسكەري قىزمەتشىلەرگە الەۋمەتتىك جەڭىلدىكتەر قاراستىرىلعانىن اتاپ ءوتتى. بۇل – قىزمەت بارىسىندا جانە زاپاسقا شىققاننان كەيىن 60 كۇنگە دەيىن نەسيەلىك دەمالىس; ۇبت تاپسىرماي, جوعارى وقۋ ورىندارىنا ءتۇسۋ مۇمكىندىگى; جۇمىسشى ماماندىقتارى بويىنشا مەملەكەتتىك كۋالىك الۋ; زاپاسقا شىققاننان كەيىن جۇمىسقا ورنالاسۋ مۇمكىندىگى.
ءا.شەگەباەۆ ءوز سوزىندە دەنساۋلىعى جارامدى ەلىمىزدىڭ ءاربىر ازاماتى زاڭعا سايكەس وتان الدىنداعى اسكەري بورىشىن مىندەتتى تۇردە وتەپ قايتۋعا ءتيىس ەكەنىن كوپشىلىك الدىندا تاعى ءبىر مارتە ەسكە سالدى.
«اكىمشىلىك قۇقىق بۇزۋشىلىق تۋرالى كودەكس بويىنشا ەش سەبەپسىز اسكەري شاقىرۋ ناۋقانىنا كەلمەگەن جاندارعا ءتيىستى شارا قولدانىلادى, سونىڭ ىشىندە مەديتسينالىق كۋالاندىرۋدان جالتارعاندارعا ەسكەرتۋ نەمەسە ايىپپۇلدار قاراستىرىلعان. ءتىپتى قىلمىستىق جاۋاپكەرشىلىككە تارتىلۋى مۇمكىن. مۇنداي جاعدايدا اسكەردەن قاشىپ جۇرگەن ازاماتتار قوعامدىق جۇمىستارعا تارتىلادى نەمەسە ءتىپتى باس بوستاندىعىنان ايىرىلۋى دا مۇمكىن», دەدى ول.
سونداي-اق بريفينگ بارىسىندا ءسوز العان «قارۋلى كۇشتەر ارداگەرلەرى» رقب شىمكەنت قالاسى بويىنشا فيليالىنىڭ توراعاسى, وتستاۆكاداعى پولكوۆنيك سەرىكباي ونباەۆ قالادا جۇمىس ىستەيتىن اسكەري-پاتريوتتىق كلۋبتارعا ورتا ءبىلىمى بار, ارنايى وقۋدان وتكەن فيزيكالىق دايىندىعى مىقتى جاستار كوبىرەك جازىلىپ جاتقانىن جانە ولاردىڭ سانى جىلدان-جىلعا كوبەيە باستاعانىن ماقتانىشپەن جەتكىزدى. ماسەلەن, بىلتىرعى كوكتەمگى-كۇزگى شاقىرۋ ناۋقانىندا اسكەري-پاتريوتتىق كلۋبتىڭ 400-دەن اسا جاس مۇشەسى اسكەر قاتارىنا الىندى.
«قالامىزدان اسكەرگە اتتانىپ جاتقان جاستارعا ايتارىم, قازىرگى تاڭدا ۇلدارىمىزعا مەملەكەت تاراپىنان كوپتەگەن جاقسى جاعداي جاسالعان. سولاردىڭ ىشىندە سارباز مەكتەبىن كورگەندەر ءبىراز جەڭىلدىكپەن قامتىلادى. اتاپ ايتقاندا, تاماقتانۋ, كيىم-كەشەك, جەكە باس گيگيەناسى قۇرالدارى, اي سايىنعى اقشالاي تولەم, مەديتسينالىق قىزمەت, پوشتالىق جونەلتۋلەر جاردەماقىسى. سونىمەن قاتار ورتا-تەحنيكالىق نەمەسە جوعارى ءبىلىمى بار اسكەري قىزمەتشىلەر 6 اي مىندەتىن وتكەرگەننەن كەيىن كەلىسىمشارت بويىنشا اسكەري قىزمەتكە ارالاسۋعا قۇقىلى», دەدى س.وڭباەۆ.
شىمكەنتتە كوكتەمگى اسكەري شاقىرۋ ناۋقانى 30 ماۋسىمعا دەيىن جالعاسادى, بارلىق ءىس-شارا ەلىمىزدىڭ زاڭناماسىنا سايكەس قاتاڭ تۇردە جۇرگىزىلەدى. شاقىرۋ قاعازدارى اسكەرگە شاقىرىلۋشىلارعا تۇرعىلىقتى نەمەسە جۇمىس ورنى بويىنشا, سونداي-اق 1414 سەرۆيسىنەن SMS-حابارلامالار ارقىلى جەتكىزىلەدى. اسكەري قىزمەتتى كەيىنگە قالدىرۋدى نەمەسە ودان بوساتۋدى جەرگىلىكتى اتقارۋشى ورگاندار ارقىلى نە ەلەكتروندىق ۇكىمەت پورتالىندا رەسىمدەۋگە بولادى.
كەيىنگە قالدىرۋ ۇدەرىسى بۇگىندە تولىعىمەن اۆتوماتتاندىرىلعان. بۇرىن قاعاز انىقتامالاردى ۇسىنۋ تالاپ ەتىلسە, ەندى ستۋدەنتتەر تۋرالى مالىمەتتەر قورعانىس مينيسترلىگىنىڭ اقپاراتتىق جۇيەسىنە تىكەلەي وقۋ-اعارتۋ مينيسترلىگى مەن عىلىم جانە جوعارى ءبىلىم مينيسترلىگىنىڭ بازالارى ارقىلى تاراتىلادى. ال شەتەلدە وقيتىن ازاماتتار ەلەكتروندىق ۇكىمەت پورتالىنىڭ كومەگىنە سۇيەنىپ ستۋدەنت رەتىندە ونلاين تىركەلە الادى.
شىمكەنت