اۋعانستاننىڭ حوست قالاسىندا تۇراتىن اقەل نازير ەسىمدى قاريا ءوزىنىڭ جاسى 140-تا ەكەنىن ايتىپ, الەمدەگى ەڭ جاسى ۇلكەن ادام اتانۋعا ۇمىتكەر بولىپ وتىر. بۇل تۋرالى جەرگىلىكتى TOLO News اقپاراتتىق اگەنتتىگى حابارلادى, دەپ جازادى Egemen.kz.
اقساقالدىڭ ايتۋىنشا, ول امانۋللا حاننىڭ تۇسىندا – اۋعانستان ۇلىبريتانيادان تاۋەلسىزدىك العان كەزدىڭ وزىندە-اق 30 جاستان اسقان ەكەن. ءتىپتى سول تاريحي ساتتە كورولدىڭ جانىندا بولىپ, جەڭىستى تويلاعانىن دا ەسكە الادى.
«مەن امانۋللا حانمەن بىرگە سارايدا بولدىم. ول كەزدە 30-دان اسقان ەدىم. بريتاندىقتار تىزە بۇگىپ, قاشىپ كەتتى دەگەندى ەستىگەندە حالىق قاتتى قۋاندى. ءبارىمىز پاتشاعا العىسىمىزدى بىلدىردىك. ول كەزدە بىرگە بولعان كوپتەگەن باسشىلار قازىر ومىردەن ءوتتى», دەيدى اقەل نازير.
قارتتىڭ تۋعان جىلى تۋرالى ناقتى قۇجات بولماعانىمەن, تۋىستارى ونىڭ جاسىن راستايتىن رەسمي تەكسەرىس جۇرگىزۋدى سۇراپ وتىر. قازىر ونىڭ اۋلەتىندە 100-دەن استام ۇرپاعى بار.
حوست گۋبەرناتورىنىڭ ءباسپاسوز حاتشىسى مۋستاعفار گۋربازدىڭ مالىمدەۋىنشە, قاريانىڭ جاسىن انىقتاۋ ءۇشىن ارنايى تەحنيكالىق توپ قۇرىلادى. ەگەر دەرەك راستالسا, اقەل نازيرگە مەديتسينالىق كومەك كورسەتىلىپ, گيننەستىڭ رەكوردتار كىتابىنا ەنگىزۋ ماسەلەسى قارالادى.
ء«بىز ازاماتتىق جاعداي اكتىلەرىن تىركەۋ ورگانى جانىنان تەحنيكالىق توپ جىبەرۋدى جوسپارلاپ وتىرمىز. ەگەر 140 جاستى راستاۋعا بولاتىن دالەل تابىلسا, ونى الەمدەگى ەڭ قارت ادام رەتىندە تىركەۋ جۇمىستارىنا كىرىسەمىز», دەدى ءباسپاسوز حاتشىسى.