اتىراۋ قالالىق اكىمدىگى كەزەكتەگى تۇرعىندارعا جەر تەلىمىن بەرۋدى ۋاقىتشا توقتاتتى. ماقسات – جەكە تۇرعىن ءۇي قۇرىلىسى ءۇشىن دايىندالعان جەر ۋچاسكەلەرىندەگى ينجەنەرلىك جەلىلەردى ۇرلاۋدىڭ الدىن الۋ, دەپ حابارلايدى Egemen.kz.
اتىراۋ قالالىق اكىمدىگىنىڭ ءباسپاسوز قىزمەتىنەن ءمالىم ەتكەندەي, جەر تەلىمىن الۋ كەزەگىندە 30 مىڭنىڭ شاماسىندا ادام تۇر.
«قالالىق اكىمدىك تاراپىنان اتىراۋ قالالىق ءماسليحاتى تۇراقتى كوميسسياسىنىڭ 2024 جىلعى 11 قىركۇيەكتەگى جيىنىندا «2007 جىلى جەر كەزەگىنە تۇرعان ازاماتتارعا قاينار تۇرعىن ءۇي الابىنان جەر ۋچاسكەلەرىن بەرۋ» تۋرالى ۇسىنىس جاسالعان ەدى. ۇسىنىس ماقۇلدانىپ, 2024 جىلدىڭ 1 قازانىنان بيىلعى 12 ناۋرىزعا دەيىن اتالعان تۇرعىن ءۇي الابىنداعى 530 جەر ۋچاسكەسى تۇرعىندارعا تولىعىمەن تابىستالدى. جەر ۋچاسكەسىن العان ازاماتتار 2007 جىلى جەر الۋ كەزەگىنە تۇرعان», دەپ مالىمدەدى اكىمدىكتىڭ ءباسپاسوز قىزمەتى.
اكىمدىكتىڭ اقپاراتىنا سۇيەنسەك, 13 ناۋرىزدان بەرى جەر تەلىمىن بەرۋ ۋاقىتشا توقتاتىلعان.
«2025 جىلدىڭ 13 ناۋرىزىنان باستاپ 2007 جىلى جەر الۋ كەزەگىنە تۇرعان ازاماتتارعا جەر ۋچاسكەلەرىن تابىستاۋ جۇمىسى ۋاقىتشا توقتاتىلدى. الداعى ۋاقىتتا باسقا دا تۇرعىن ءۇي الابى دايىن بولىپ, ينجەنەرلىك جەلىلەرى تولىق جۇرگىزىلگەننەن كەيىن جەر ۋچاسكەلەرىن تابىستاۋ قايتا جالعاساتىندىعىن حابارلايمىز, دەپ ناقتىلادى اكىمدىكتىڭ ءباسپاسوز قىزمەتى.