ادامداردى ولىمنەن قۇتقارعان بىرنەشە ازامات ماراپاتتالدى

تاۋداعى كومەك

الماتىدا تجم قىزمەتكەرلەرى, «109» قىزمەتىنىڭ قۇتقارۋشىلارى جانە تاۋدان ءتۇسۋ كەزىندە اۋىر جاراقات العان ادامعا جەدەل كومەك كورسەتكەن قالا تۇرعىندارى توتەنشە جاعدايلار ءمينيسترىنىڭ بۇيرىعىمەن گراموتامەن ماراپاتتالدى.

وقيعا 1 اقپاندا بولعان. كۋاگەرلەر رۋسلان شەستاكوۆ, انۋاربەك بەيسەنوۆ, اسىلجان دوسجانوۆ – زارداپ شەككەن ادامدى ءبىرىنشى بولىپ بايقاپ, وعان العاشقى جاردەم كورسەتكەن. كوپ ۇزاماي اپاتتار مەديتسيناسى ورتالىعىنىڭ دارىگەرلەرى ايبەك ساعىمجانوۆ پەن گۇلنيسا اناياتوۆا جانە «109» قىزمەتىنىڭ قۇتقارۋشىلارى پارحات يۋنۋسوۆ پەن جومارت ساۋدانبەكوۆ كەلگەن.

« ۇلىم اۋىر جاراقات الدى, ونىڭ ومىرتقاسى سىندى. مەن كومەككە كەلگەن باتىل ادامداردىڭ ارقاسىندا ونىڭ ءتىرى قالعانىنا سەنىمدىمىن. رۋسلان شەستاكوۆ, اسىلجان دوسجانوۆ, انۋاربەك بەيسەنوۆ ۇلىمنىڭ دارىگەرلەردى كۇتۋى ءۇشىن قولدان كەلگەننىڭ ءبارىن جاسادى. قيىن جاعدايلارعا قاراماستان, ونى جەدەل تۇردە اۋرۋحاناعا جەتكىزگەن قۇتقارۋشىلار مەن مەديتسينالىق توپقا ەرەكشە العىس ايتامىز. ءار مينۋت ماڭىزدى بولدى», دەدى ەر ادامنىڭ اناسى شىنار ىزتىلەۋوۆا.

ءبىر وتباسىن ەكى ستۋدەنت قۇتقاردى

سالا ءمينيسترى گەنەرال-مايور شىڭعىس ءارىنوۆتىڭ بۇيرىعىمەن اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ستۋدەنتتەرى 20 جاسار ەرنار تۇرسىن جانە 22 جاسار نۇراسىل الىمتاەۆ «ورتتە كورسەتكەن قايسارلىعى ءۇشىن» مەدالدارىمەن ماراپاتتالدى.  

ەستەرىڭىزگە سالايىق, 2 ناۋرىزدا تۇندە الماتى قالاسى, جەتىسۋ اۋدانىندا جەكە مەنشىك تۇرعىن ءۇيدىڭ جانىپ جاتقانىن بايقاعان ءارى كومەك سۇراعان ايقايلاردى ەستىگەن اتالعان 2 ستۋدەنت وقيعا تۋرالى 112-ءشى قىزمەتكە جەدەل حابارلاعان. قاتتى ءتۇتىن مەن جوعارى تاۋەكەلگە قاراماستان, جانىپ جاتقان ۇيگە جۇگىرگەن 2 ستۋدەنتتىڭ شەشۋشى ارەكەتتەرىنىڭ ارقاسىندا 64 جاستاعى ايەل, 17 جاستاعى جانە 6 جاسار قىز قۇتقارىلعان ەدى.

تاراز تۇرعىنى جانىپ جاتقان كولىكتەن ادامداردى قۇتقارعان

ءمينيستردىڭ «ورتتە كورسەتكەن قايسارلىعى ءۇشىن» مەدالىمەن زاۋىربەك ماناپباي ماراپاتتالدى.

ەستەرىڭىزگە سالايىق, 8 قازاندا تاراز قالاسىندا تەحنيكالىق قىزمەت كورسەتۋ ستانتسياسى جانىندا بىرنەشە اۆتوكولىكتىڭ قاتىسۋىمەن جول كولىك وقيعاسى بولعان, كولىكتەردىڭ ءبىرى ورتەنىپ, كەلەسى كولىكتە جۇرگىزۋشى مەن جولاۋشى قالىپ قويدى. ستو قىزمەتكەرى زاۋىربەك ماناپباي ەش ويلانباستان ءوز ءومىرىن قاتەرگە تىگىپ, جانىپ جاتقان كولىككە كىرىپ, ادامداردى قاۋىپسىز جەرگە ەۆاكۋاتسيالاۋ ارقىلى قۇتقارعان. ول سونىمەن قوسا, زارداپ شەككەندەرگە شۇعىل قىزمەتتەر كەلگەنگە دەيىن قاجەتتى كومەك كورسەتكەن.