جاقىندا اتىراۋلىق ءتورت قىزدىڭ تۇمشالانىپ, ارابشا جازۋى بار مەملەكەتتىك تۋ ۇستاپ تۇسكەن سۋرەتى جەلىدە رەزونانس تۋدىرعان ەدى. بۇگىن دەپۋتات ەرمۇرات باپي ءماجىلىستىڭ جالپى وتىرىسىندا وسى وقيعانى جان-جاقتى زەرتتەۋدى تالاپ ەتىپ, باس پروكۋرور ب.اسىلوۆتىڭ اتىنا ساۋال جولدادى, دەپ جازادى Egemen.kz.
ەرمۇرات باپي 4 قىز ۇستاپ تۇرعان كوك تۋدا اراب قارپىندەگى جازۋدىڭ وتە ساپالى تۇردە, ارنايى باسپا قۇرالىمەن تاڭبالانعانىنا نازار اۋداردى. دەپۋتاتتىڭ بۇل وقيعانى جاي عانا تۇرمىستىق بۇزاقىلىق, ادەپسىز شەكتەن شىعۋشىلىق قانا ەمەس, قوعامىمىزعا, مەملەكەتتىگىمىزگە, ۇلتتىق ءداستۇرىمىز بەن بىرەگەيلىگىمىزگە جاسالعان اشىق جانە ناقاق قارسىلىق, دەپ پايىمدادى. سوندىقتان مۇنداي زاڭ بۇزۋشىلىق قاتاڭ ءارى مۇلتىكسىز جازالانۋى ءتيىس ەكەنىن العا تارتتى.
«بىراق ەسكەرە كەتەتىن ءبىر ءجايت – ەلدىڭ تۋىن ءبۇلدىرۋ ارقىلى جات پيعىلدى دارىپتەمەك بولعان بۇل ءتورت قىز الدەبىر ارانداتۋشى توپتىڭ قۇربانى بولۋى مۇمكىن. ولار جاستىق الاڭعاسىرلىقپەن, الدە ماتەريالدىق قىزىعۋشىلىقپەن نەمەسە ءدىني ساۋاتسىزدىقپەن جاساعان بۇل ورەسكەل زاڭ بۇزۋشىلىقتىڭ تاساسىندا تۇرعان الدەبىر كەرەعار كۇشتەر بار سياقتى. مىنە, اكىمشىلىك تۇرعىداعى جازاسىن العان ءتورت قىزدان بۇرىن, وسى قىلمىستى ارەكەتتى ۇيىمداستىرۋشىلار جازاعا تارتىلۋى ءتيىس», دەدى ول.
ماجىلىسمەن تۇر-ءتۇسى بۇرمالانعان قازاقستان تۋى Wildberries Russ ماركەتپلەيسىندە 5000 مىڭ تەڭگەدەن ەركىن جانە اشىق ساۋدادا ساتىلىپ جاتقانىن اتاپ ءوتتى.
بەكىتىلگەن ستاندارتقا سايكەس كەلمەيتىن, رەسمي سيپاتى بۇرمالانعان مەملەكەتتىك ءرامىزدى ساتۋعا شىعارعان ساۋدا ورىندارىنىڭ باسشىلىعىن جاۋاپقا تارتۋ كەرەك. ساتىلىپ كەتكەن تۋلاردى جيناپ الىپ, جويۋ قاجەت!
«سونداي-اق, ءتيىستى زاڭناماعا مەملەكەتتىلىگىمىزدى مانسۇقتايتىن, قوعامدى جىككە ءبولۋدى كوزدەيتىن تاۋارلار ساتقان جەكەلەگەن ماركەتپلەيستەرگە قارسى سانكتسيا سالۋدى كوزدەيتىن تۇزەتۋلەر ازىرلەپ, ونى زاڭ نورماسىنا ەنگىزۋ كەرەك. مەملەكەت راديكالدى اعىمداردىڭ ورەسكەل ارەكەتتەرىنە باقىلاۋدى كۇشەيتىپ, ءدىني قۇندىلىقتاردى بۇرمالاۋعا قارسى شارالاردى قاتاڭداتۋ قاجەت. ۇلتتىق بىرەگەيلىكتى قورعاۋدىڭ جۇيەلى جانە جالپىعا ورتاق ساياساتىن قالىپتاستىراتىن ۋاقىت جەتتى. زايىرلى ءبىلىم بەرۋ جۇيەسىن نىعايتۋدى, ورتا مەكتەپتەردەگى ءدىنتانۋ ساباقتارىن ۇلتتىق مۇرالار نەگىزىندە جۇرگىزۋ باعدارلاماسى دايىندالۋى كەرەك», دەدى ە.باپي.
سونىمەن قاتار, دەپۋتات ءتيىستى ۋاكىلەتتى مەملەكەتتىك ورگاندارعا ۇلتتىق مادەنيەتتى دامىتۋ, ءداستۇرلى كيىم كيۋ باستامالارىن قولداۋ جانە جاستار اراسىندا كەڭ كولەمدە ءتۇسىندىرۋ جۇمىستارىن جۇرگىزۋدى ۇسىندى.