نيۋ-يورك قالاسىندا الەمگە ايگىلى قاراعاندىلىق سۋرەتشى كارىپبەك كۇيىكوۆتىڭ سۋرەتتەرىنىڭ «پوليگون جاڭعىرىعى» اتتى كورمەسى تانىستىرىلدى.
بۇۇ شتاب-پاتەرىندە يادرولىق قارۋعا تىيىم سالۋ تۋرالى شارتقا قاتىسۋشى مەملەكەتتەردىڭ كونفەرەنتسياسىنا قاراعاندى وبلىسىنىڭ دەلەگاتسياسى دا قاتىستى.
وڭىردەن بارعان دەلەگاتسيا وكىلدەرى سەمەي يادرولىق پوليگونىنىڭ قۇربانى, الەمگە ايگىلى سۋرەتشى كارىپبەك كۇيىكوۆتىڭ سۋرەتتەرى مەن وبلىستىق تاريحي-ولكەتانۋ مۋزەيىنىڭ قورىنان «پوليگون جاڭعىرىعى» اتتى فوتوكورمەمەن تانىستىردى.
ء«بىزدىڭ وتانىمىزدىڭ ونەرىن بۇۇ سياقتى ماڭىزدى حالىقارالىق تۇعىرنامادا تانىستىرۋ – ءبىز ءۇشىن ۇلكەن مارتەبە. ءبىز شىعارماشىلىق پەن ونەر ارقىلى بەيبىتشىلىك پەن تۇراقتىلىقتىڭ ماڭىزدىلىعى تۋرالى, جاھاندىق قاۋىپسىزدىكتى قولداۋداعى ءاربىر ادامنىڭ ءرولىن جەتكىزە الاتىنىمىز انىق», دەيدى وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى ەركەبۇلان جۇماكەنوۆ.
يادرولىق قارۋدى تاراتپاۋ جونىندەگى كونفەرەنتسيا – ۇكىمەتتەردى, عالىمداردى, بەلسەندىلەر مەن ازاماتتىق قوعام وكىلدەرىن قوسا العاندا, الەمنىڭ تۇپكىر-تۇپكىرىنەن دەلەگاتتاردى جينايتىن الەمدىك ارەناداعى ماڭىزدى وقيعا.
وبلىس ۇيىمداستىرعان كورمە قاتىسۋشىلاردىڭ نازارىن بەيبىتشىلىكتى ساقتاۋ جونىندەگى جاھاندىق كۇش-جىگەردىڭ ماڭىزدىلىعىنا اۋداردى.
ايماق دەلەگاتسياسىنىڭ وسى ماڭىزدى فورۋمعا قاتىسۋى قازاقستاننىڭ الەمدىك قوعامداستىقپەن مادەني جانە ديپلوماتيالىق بايلانىستارىن تەرەڭدەتۋگە ىقپال ەتكەنىن ماقتان تۇتادى. كارىكبەك كۇيىكوۆ كورمەسى, سونداي-اق مۇراجاي قورىنداعى فوتوكورمە كونفەرەنتسيا بويى جۇمىس ىستەدى.
كورمەگە كۇن سايىن 100-دەن استام ادام كەلىپ, ولاردىڭ ارقايسىسى كارىپبەك كۇيىكوۆتىڭ ونەرىنە, قازاقستاننىڭ يادرولىق قارۋدى تاراتپاۋ قوزعالىسىنا قوسقان ەرەكشە ۇلەسىنە ءتانتى بولدى.
«سەمەي پوليگونى – كسرو-نىڭ يادرولىق سىناق پوليگوندارىنىڭ ءبىرى, اسا ماڭىزدى ستراتەگيالىق نىساناسى بولدى. كسرو يادرولىق سىناق جۇرگىزۋگە قازاقستاندى تاڭدادى. ويتكەنى دالالىق جەرى كوپ, حالىق سانى از. قازاقستاندا 1949 جىلى العاش رەت سىناق باستالدى. سەمەي پوليگونى جابىلعانعا دەيىن قازاق دالاسىندا قانشاما جارىلىس جاسالدى. اتا-انام سول سىناقتاردى ءوز كوزىمەن كورگەن. كارتينالارىمدا سول يادرولىق جارىلىس ءساتىن, سىناقتىڭ زاردابى تيگەن قازاق شاڭىراعىن بەينەلەدىم», دەيدى سۋرەتشى.
كارىپبەك ءوزىنىڭ ونەرىنىڭ ارقاسىندا الەمدەگى بەيبىتشىلىك پەن يادرولىق قارۋمەن كۇرەستىڭ سيمۆولىنا اينالعان جان. قىلقالامنىڭ قۇدىرەتىمەن ءوز كارتينالارىندا ادامزاتتىڭ قاسىرەتىن جەتكىزدى. سونىسىن الەم مويىندادى. كارىپبەك كۇيىكوۆ نوبەل سىيلىعىنىڭ نومينانتى بولدى. الەمنىڭ بىرنەشە ەلىندە كارىپبەك تەلتاي ۇلىنىڭ كارتينالارى كورمەگە قويىلدى. سونداي-اق, ول «نەۆادا-سەمەي» حالىقارالىق انتيادرولىق قوزعالىسىنىڭ بەلسەندىسى بولىپ, سەمەي يادرولىق پوليگونىنىڭ جابىلۋىنا زور ۇلەس قوستى. ونىڭ ءار تۋىندىسىندا كۇرەس, ءۇمىت, بەيبىت, ومىرگە ۇمتىلۋ بار.
«ونىڭ شىعارمالارىن تانىستىرا وتىرىپ, ءبىز ەلىمىزدىڭ بۇكىل الەمدەگى بەيبىتشىلىك پەن تۇراقتىلىقتى قولدايتىنىن كورسەتتىك. ءبىزدىڭ باستى ماقساتىمىز – بولاشاق ۇرپاق ءۇشىن قاۋىپسىز, گۇلدەنگەن الەمدى قالدىرۋ!», دەيدى دەلەگاتسيا قۇرامىنداعىلار.
قاراعاندى وبلىسى