باس پروكۋرور بەرىك اسىلوۆ ءوزىنىڭ الەۋمەتتىك جەلىدەگى پاراقشاسىندا ەلىمىزدەگى بىرقاتار اۋىلداردىڭ ءسپيرتتى ىشىمدىكتەردى ساتۋدان ءوز ەركىمەن باس تارتىپ جاتقانى تۋرالى جازبا جاريالادى, دەپ حابارلايدى Egemen.kz.
«ەلىمىز بويىنشا جۇزدەگەن اۋىلدار ءوز ەركىمەن ءسپيرتتى ىشىمدىكتەردى ساتۋدان باس تارتۋدا. بۇل — قاراپايىم حالىقتىڭ سانالى تاڭداۋى. ءتارتىپ, دەنساۋلىق جانە بالالارىنىڭ بولاشاعى ءۇشىن جاسالعان شەشىم. ماسەلەن, ماڭعىستاۋ وبلىسىنىڭ ماڭعىستاۋ اۋدانىنداعى ءبىر اۋىلدا تۇرعىندار ىشىمدىكتى ساتۋدان ءوز ەركىمەن باس تارتىپ, بۇل تۋرالى بەينەروليكتى الەۋمەتتىك جەلىلەردە جاريالادى», دەپ جازدى باس پروكۋرور.
ونىڭ ايتۋىنشا, ماڭعىستاۋ, اقمولا, جامبىل, قاراعاندى, اتىراۋ وبلىستارىنداعى بىرنەشە اۋىل تۇرعىندارى دۇكەندەردەن ىشىمدىكتى ساتۋدى توقتاتقان.
ء«يا, بۇل ەلدەگى بارلىق اۋىل سانىن ەسكەرسەك, تەڭىزگە تامعان تامشىداي كورىنۋى مۇمكىن. بىراق باستىسى — جاعدايدىڭ وڭ سەرپىنى بار. مۇنداي ەلدى مەكەندەر سانى ارتىپ كەلەدى. ادامدار سەنىم مەن تۇراقتىلىقتى, تىنىشتىقتى جوعارى باعالاپ, ءبىر-بىرىنە ۇلگى بولا باستادى. باستاما اۋىل اقساقالدارى مەن قوعامدىق كەڭەستەردەن شىعىپ, پروكۋراتۋرا, پوليتسيا جانە جەرگىلىكتى اكىمدىكتەردىڭ تاراپىنان ۇيلەستىرۋ, الدىن الۋ جانە قاۋىپسىزدىك قامتاماسىز ەتىلدى», دەدى بەرىك اسىلوۆ.
بۇل رەتتە بەرىك اسىلوۆ اۋىل كاسىپكەرلەرىنىڭ ەرەكشە العىسقا لايىق ەكەندىگىن اتاپ ءوتتى. سەبەبى, ولار جەرلەستەرىنىڭ ءۇنىن ەستىپ, دۇكەن سورەلەرىنەن ىشىمدىكتى ءوز ەركىمەن الىپ تاستاعان.
«كۇماندانعانمەن, تابىستارى ازايعان جوق. كەرىسىنشە, اۋىل تۇرعىندارى ىشىمدىكتىڭ ورنىنا بالالارعا پايدالى ازىق-ت ۇلىكتەردى ءجيى ساتىپ الا باستادى. ناتيجەلەر وزدىگىنەن كورىنىپ تۇر. اتاپ ايتساق, كەيبىر اۋىلداردا قىلمىس مۇلدە جويىلىپ, تۇرمىستىق جانجالدار توقتادى جانە جاستار سپورت پەن سانالى ءومىر سالتىن تاڭداي باستادى», دەدى ب. اسىلوۆ.
سونىمەن قاتار, باس پروكۋرور ءتارتىپتىڭ قورقىنىش ارقىلى ەمەس, سەنىم مەن سانالى تاڭداۋ ارقىلى ورنايتىنىن باسا ايتتى.
«بۇل — «زاڭ جانە ءتارتىپ» قاعيداتىنىڭ ومىردەگى ناقتى كورىنىسى. ءتارتىپ قورقىنىشپەن ەمەس — سەنىممەن, جازا ارقىلى ەمەس — سانالى تاڭداۋمەن ورنايدى. «زاڭ مەن ءتارتىپ — كەمەل دەموكراتيانىڭ ىرگەتاسى ءارى قۇقىقتىق مەملەكەتتىڭ نەگىزى», – دەپ مەملەكەت باسشىسى اتاپ وتكەن ەدى. ءبىز بولاشاققا دەگەن قامقورلىق, قوعامدىق كەلىسىم جانە زاڭعا قۇرمەتكە نەگىزدەلگەن ءاربىر باستامانى قولدايمىز», دەپ تۇيىندەدى باس پروكۋرور.
ايتا كەتەيىك, رەسمي ستاتيستيكا بويىنشا بيىلعى جىلدىڭ العاشقى ءۇش ايىندا الكوگولدىك ماس كۇيىندە جاسالعان قىلمىستار سانى ازايعان.