سولتۇستىك قازاقستان وبلىسىنداعى قوزىباەۆ ۋنيۆەرسيتەتى 2024-2025 وقۋ جىلىندا «سەرپىن» مەملەكەتتىك باعدارلاماسى اياسىندا 200-دەن استام ستۋدەنتتى قابىلدايدى. باعدارلاما ەلىمىزدىڭ وڭتۇستىك وڭىرلەرىنەن كەلگەن جاستارعا ءبىلىم الىپ, كەيىن سولتۇستىك ايماقتاردا جۇمىسقا ورنالاسۋعا مۇمكىندىك بەرەدى, دەپ حابارلايدى Egemen.kz.
قوزىباەۆ ۋنيۆەرسيتەتىنىڭ وكىلدەرى مەكتەپ تۇلەكتەرى مەن ولاردىڭ اتا-انالارىنا باعدارلامانىڭ ارتىقشىلىقتارىن ءتۇسىندىرۋ ءۇشىن كاسىبي باعدار بەرۋ كەرۋەنىن جولعا شىعاردى. ارنايى دەلەگاتسيا قۇرامىندا وقىتۋشىلار مەن ستۋدەنتتەر بار. ولار شىمكەنت, قىزىلوردا, تۇركىستان جانە جامبىل وبلىستارىنداعى 30 ەلدى مەكەندى ارالاپ, 6 500 شاقىرىم جول جۇرەدى.
ەلىمىزدىڭ جوعارى وقۋ ورنى اريزونا ۋنيۆەرسيتەتىمەن سەرىكتەستىك ورناتىپ, قوس ديپلومدىق ءبىلىم بەرۋ باعدارلاماسىن ۇسىنىپ وتىر. بۇل جوبا «سەرپىن» باعدارلاماسىنىڭ قاتىسۋشىلارىنا حالىقارالىق دەڭگەيدە ءبىلىم الۋعا جول اشادى.