«قازگيدرومەت» سينوپتيكتەرى 1, 2 جانە 3 ءساۋىر كۇندەرىنە ارنالعان اۋا رايى بولجامىن جاريالادى, دەپ حابارلايدى Egemen.kz.
الداعى كۇندەرى رەسپۋبليكا اۋماعىنىڭ باسىم بولىگىندە اۋا رايى تۇراقسىز بولادى. نايزاعاي ويناپ, جاڭبىر جاۋادى, سولتۇستىك جانە شىعىس وڭىرلەردە تۇنگى ۋاقىتتا جاڭبىردىڭ سوڭى قارعا اينالۋى مۇمكىن.
ورتالىق پەن وڭتۇستىك ايماقتاردا عانا جوعارى قىسىم القابىنىڭ اسەرىنەن جاۋىن-شاشىنسىز اۋا رايى كۇتىلەدى. باتىس, سولتۇستىك جانە شىعىس وڭىرلەردە جەل كۇشەيىپ, تاۋلى اۋدانداردا تۇمان تۇسەدى.
- ەل اۋماعىنىڭ باسىم بولىگىندە كۇندىز تەمپەراتۋرا 8-13 گرادۋستان 15-20 گرادۋسقا دەيىن, وڭتۇستىكتە 18-23 گرادۋستان 20-28 گرادۋسقا دەيىن, وڭتۇستىك-شىعىستا 12-20 گرادۋستان 18-23 گرادۋسقا دەيىن كوتەرىلەدى, ال شىعىستا 5-15 گرادۋس جىلى بولادى. باتىستا تەمپەراتۋرا 15-25 گرادۋستان 13-22 گرادۋسقا دەيىن تومەندەيدى, – دەلىنگەن حابارلامادا.