الەم كۋبوگىنىڭ جولدامالارى الماتىدا ساراپقا سالىنادى

وسىدان ەكى جىل بۇرىن تاجىكستاننىڭ باس شاھارى – دۋشانبەدە ۇيىمداستىرىلعان ىرىكتەۋ سايىستارىندا نەبارى ءۇش جولداما ساراپقا سالىنعان ەدى. ول كەزدە جەرلەستەرىمىز اسەل سەرىكباي مەن الىشەر سۇلەيمەنوۆ جانە وزبەكستاندىق نوديربەك ياكۋببوەۆتىڭ باعى جانىپ, الەم كۋبوگىنە قاتىسۋ قۇقىعىن جەڭىپ الدى. ال بيىل ليتسەنزيالار سانى جەتىگە جەتىپ وتىر. الماتىداعى جارىستىڭ قورىتىندىسى بويىنشا نيۋ-دەليدەگى دوداعا (1-26 قاراشا) ءتورت جىگىت قاتىسسا, ۇزدىك شىققان ءۇش قىز باتۋميدەگى باسەكەدە (5-29 ماۋسىم) باق سىنايدى.

اتالعان جارىستىڭ جۇلدە قورى 20 000 اقش دوللارىن قۇرايدى. ەرلەر مەن ايەلدەر اراسىنداعى جارىستىڭ جەڭىمپازدارى 3 مىڭ دوللاردان يەلەنسە, ەكىنشى جانە ءۇشىنشى ورىن العاندارعا 2,5 مىڭ مەن 1,5 مىڭ دوللار تيەسىلى. سونداي-اق, ءتورتىنشى ($1,2 مىڭ), بەسىنشى ($1 مىڭ) جانە التىنشى ($800) ورىن العاندارعا دا سىياقى بەرىلەدى.

قازاقستاننىڭ تۋى استىندا ەرلەر اراسىندا قازىبەك نوگەربەك (GM, 2530 ۇپاي), الىشەر سۇلەيمەنوۆ (GM, 2484), رامازان جالماحانوۆ (GM, 2482), جاندوس اعمانوۆ (IM, 2469), ارىستانبەك ورازاەۆ (IM, 2467), ەدگار مامەدوۆ (IM, 2456) جانە ازامات وتەعاليەۆ (IM, 2456) قورعاسا, ايەلدەر سايىسىندا مەرۋەرت كاماليدەنوۆا (IM/WGM, 2355), الۋا نۇرمان (WGM, 2336), ليا كۇرمانعاليەۆا (FM/WGM, 2272), كسەنيا بالاباەۆا (WGM, 2270), ەلناز قالياحمەت (WGM, 2241), اسەل سەرىكباي (WIM, 2235), اياۋلىم قالداروۆا (WFM, 2204) جانە زارينا نۇرعاليەۆا (WFM 2178) ونەر كورسەتەدى.

وزبەكستان قۇراماسى دا ءوزىنىڭ مىقتى شاحماتشىلارىن الاتاۋ باۋرايىنا اكەلە جاتىر. اتالعان تۋرنيردە باق سىنايتىندار اراسىندا مۇحيددين مادامينوۆ (GM, 2550), ابدىمالىك ءابدىسالىموۆ (GM, 2525), ورتيك نيگماتوۆ (GM, 2501), مۇحاممادزوحيد سۋياروۆ (IM, 2474), سايداكبار سايداليەۆ (M, 2461), افرۋزا حامداموۆا (WIM, 2350) جانە ۋميدا ومونوۆا (WIM, 2242) سىندى شەبەرلەر بار. سونداي-اق, تۇرىكمەنستاننىڭ ساپىنداعى ساپارمۇراد اتاباەۆتى دا (IM, 2529) اتاپ وتۋگە بولادى.