كوپەنگاگەندەگى كورول باعىندا ەرەن ەرتەگىشى گانس حريستيان اندەرسەننىڭ ەجەلگى ەسكەرتكىشى تۇر. ولاي دەيتىن سەبەبىمىز تاس ءمۇسىن اندەرسەننىڭ كوزى تىرىسىندە سالىنعان. الايدا ەسكەرتكىشتىڭ العاشقى نۇسقاسى ونىڭ كوڭىلىنەن مۇلدە شىقپاعان. جوبانىڭ سىزباسىندا قالامگەردىڭ تىزەسىنە وتىرىپ ەرتەگى تىڭداعان بالا بەينەلەنگەن كورىنەدى.
بۇل تۋرالى اندەرسەن 4 ماۋسىم كۇنى كۇندەلىگىنە مىناداي جازبا قالدىرادى: «كەشقۇرىم ءمۇسىنشى سوبيۋ كەلدى. مەن وعان ەسكەرتكىشتىڭ ۇناماعانىن جەتكىزدىم. بىراق ول مەنى تۇسىنبەدى. باسقالار دا سولاي. مەنىڭ ەرتەگىلەرىم بالالارعا ەمەس, نەگىزىنەن ەرەسەكتەرگە ارنالعان. بالالار ەرتەگىنى ءۇستىرت وقىپ شىعادى, ال ساناسى جەتىلگەن جاندار ونىڭ ماعىناسىنا تەرەڭدەپ ەنەدى».
راس... ورالحانشا وراعىتساق, نەگە ءبىز وسى ەر جەتكەننەن كەيىن ەرتەگى وقۋدى جالعاستىرمايمىز؟
مۇنىڭ سەبەبى عاجايىپقا سەنبەۋدەن شىعار دەيمىن. دۇنيەنى تۇگىلىمەن راتسيونالدى تۇرعىدا قابىلداۋ – كوڭىل قۇسىن تورعا قاماپ تاستاۋمەن بىردەي قىلمىس.
جاۋعا جالعىز شاپقان الپامىستىڭ ەرلىگى نەگە مۇمكىن ەمەستەي كورىنەدى؟ ءبارى دە مۇمكىن. ەر توستىككە عايىپتان تايىپ تاۋسوعار, جەلاياق, كولتاۋىسار نەگە كەلمەسىن؟ كەلەدى. بۇرىنعى قازاق دۇنيەنى وسىلاي قابىلداعان. قۇدايدىڭ كەز كەلگەن قىسىلتاياڭنان الىپ شىعاتىنىنا يمانداي سەنگەن. سول ارقىلى ولاردىڭ بويىندا ەرلىك تە, ورلىك تە بولدى.
اباي ايتادى: «اقىلعا سىيماس ول اللا» دەپ. ەندەشە قۇدايعا يلانعان حالىق بولساق, بىزگە ءدال وسى بايىرعى سەنىمدى قايتا جاڭعىرتۋ كەرەك.
اسىلىندا, وتباسىعا قامقورلىق, وتانعا جانقيارلىق ماحاببات وسىدان كەلىپ شىعادى.