مۇناي-حيميا زاۋىتىندا ءورت شىعىپ, ەكى جۇمىسشىنى كۇيىك شالدى

وڭىرلىك توتەنشە جاعدايلار دەپارتامەنتىنەن حابارلاعانداي, 27 ناۋرىز كۇنى ساعات 23.40-تا پاۆلودار مۇناي-حيميا زاۋىتىنىڭ اۋماعىندا ءورت پايدا بولعانى تۋرالى حابارلاما كەلىپ تۇسكەن.

«وقيعا ورنىنا جەدەل تۇردە ءورت سوندىرۋشىلەر  جىبەرىلدى. پاۆلودار قالاسىنىڭ ءورت ءسوندىرۋ بولىمشەلەرىنىڭ بارلىق جەكە قۇرامىن جيناۋ جۇزەگە اسىرىلدى, قوسىمشا ءورت ءسوندىرۋ تەحنيكاسى ەسەپكە ەنگىزىلدى. جەدەل جانە ۇيلەسىمدى ارەكەتتەردىڭ ارقاسىندا ءورتتىڭ تارالۋىنا جول بەرىلگەن جوق. العاشقى بولىپ جەتكەن «پمحز» جشس مەوقق كۇشىمەن جانىپ جاتقان ايماق جويىلىپ,   تەحنولوگيالىق قوندىرعىلاردى وقپان ارقىلى سالقىنداتۋ جۇرگىزىلدى. 

ءورت 50 شارشى الاڭدا ساعات 00.40-تا تولىقتاي جويىلدى. ءورتتى سوندىرۋگە توتەنشە جاعداي دەپارتامەنتىنىڭ كۇشتەرى مەن قۇرالدارى قاتىستى, سونىمەن قاتار «پمحز» جشس موقق ,103 قىزمەتى دە جۇمىس ىستەدى. وقيعا ورنىندا جەدەل ءورت ءسوندىرۋ شتابى ورنالاستىرىلدى», دەپ مالىمدەدى توتەنشە جاعدايلار دەپارتامەنتىنەن.

بەلگىلى بولعانداي, زاۋىتتىڭ 1989 جانە 1982 جىلى تۋعان ەكى قىزمەتكەرى كۇيىكپەن اۋرۋحاناعا جەتكىزىلگەن. ولارعا مەديتسينالىق كومەك كورسەتىلگەن, بىراق اۋرۋحاناعا جاتقىزۋدىڭ قاجەتى بولماعان.

وقيعا مۇناي زاۋىتىنىڭ تەحنولوگيالىق پروتسەسىنە اسەر ەتپەگەن. ءورتتىڭ سەبەبى انىقتالىپ جاتىر.