الەۋمەتتىك جەلىدە قارا ءتۇستى پارەنجە كيگەن ءتورت ازاماتتىڭ بۇرمالانعان قازاقستان تۋىمەن تۇسكەن سۋرەتى تارادى. پوليتسيا بۇل فاكتىگە قاتىستى قىلمىستىق ءىس قوزعادى, دەپ حابارلايدى Egemen.kz.
اتىراۋداعى مۇز ايدىنىندا تۇسىرىلگەن سۋرەت ەل ىشىندە ۇلكەن نارازىلىق تۋدىردى. سۋرەتتە قازاقستان تۋىنىڭ جوعارعى بولىگىنە ساۋد ارابياسىنىڭ مەملەكەتتىك تۋىنداعى جازۋ تاڭبالانعان. الەۋمەتتىك جەلى قولدانۋشىلارى مۇنى تەرىس ءدىني باعىت وكىلدەرىنىڭ ەل قۇندىلىعىن قورلاۋى دەپ باعالاپ, ءتيىستى جازا تاعايىندالۋىن سۇرادى.
«بۇل فوتوسۋرەتتىڭ تارالۋىنا بايلانىستى مەملەكەتتىك رامىزدەردى قورلاۋ بابىنا سايكەس قىلمىستىق ءىس قوزعالدى. سوتقا دەيىنگى تەرگەۋ باستالدى. فوتوسۋرەتتە بەينەلەنگەن ءتورت كۇدىكتى دە انىقتالىپ, پوليتسياعا جەتكىزىلدى. تەرگەۋ مۇددەسىنە قاتىستى باسقا مالىمەتتەر جاريا ەتىلمەيدى», دەدى اتىراۋ وبلىستىق پوليتسيا دەپارتامەنتى.