28 ناۋرىز كۇنى ءتۇن مەزگىلىندە جامبىل وبلىسى اۋماعىندا بولعان جەر سىلكىنىسىن بىرنەشە اۋدان تۇرعىنى سەزىندى. جەر ءدۇمپۋىنىڭ جوعارى قارقىنى 5 باللدى قۇرادى. ءوڭىر باسشىسى ەربول قاراشوكەەۆتىڭ تاپسىرماسىمەن وبلىستىق شتاب جەدەل ىسكە كىرىستى, دەپ جازادى Egemen.kz.
وبلىس اكىمى ءمان-جايدى زەردەلەۋ ءۇشىن جەر ءدۇمپۋى قاتتى سەزىلگەن مەركى جانە تۇرار رىسقۇلوۆ اۋداندارىنا جۇمىس ساپارىمەن اتتاندى. جامبىل وبلىسى اكىمدىگىنىڭ ءباسپاسوز قىزمەتى تاراتقان رەسمي مالىمەتكە سەنسەك, جەر سىلكىنىسى سالدارىنان زارداپ شەككەندەر جوق. ايتسە دە الدىن الا مالىمەت بويىنشا تۇرار رىسقۇلوۆ اۋدانى قاراقىستاق اۋىلىنداعى مادەنيەت ءۇيى, مەركى اۋداندىق اۋرۋحاناسى جانە ويتال اۋىلىنداعى ءبىلىم وشاعىنىڭ قابىرعاسىندا جارىقشاق پايدا بولعان. باسقا نىساندار تۋرالى مالىمەتتەر ناقتىلانىپ جاتىر.
وڭىردە تىرشىلىكتى قامتاماسىز ەتۋ جۇيەلەرى مەن جەدەل جەلى ءنومىرى ۇزدىكسىز جۇمىس ىستەپ تۇر.