قازاقستان پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ استاناعا العاشقى رەسمي ساپارىمەن كەلگەن ارمەنيانىڭ سىرتقى ىستەر ءمينيسترى ارارات ميرزويانمەن كەزدەستى.
تاراپتار قازاق-ارميان قاتىناستارىنىڭ كەڭ اۋقىمدى ماسەلەلەرىن تالقىلادى. اتاپ ايتقاندا, ەكى ەل اراسىنداعى ساياسي, ساۋدا-ەكونوميكالىق جانە مادەني-گۋمانيتارلىق ءوزارا ءىس-قيمىلدىڭ باسىم باعىتتارى, سونداي-اق بيىلعا ارنالعان جوعارى دەڭگەيدەگى ءىس-شارالار كەستەسى قاراستىرىلدى. دوستىق پەن ءوزارا ءتيىمدى ىنتىماقتاستىق نەگىزىندە ەكىجاقتى سەرىكتەستىكتى تەرەڭدەتۋگە ءمان بەرىلدى. تاراپتار نيەتىنىڭ ءىس جۇزىندەگى كورىنىسى ارمەنيانىڭ قاراعاندى مەن اقتوبەدەگى قۇرمەتتى كونسۋلدارىنىڭ كەڭسەلەرىن اشۋ بولدى.
«ارمەنيا – قازاقستاننىڭ وڭتۇستىك كاۆكازداعى سەنىمدى ساياسي جانە ساۋدا-ەكونوميكالىق سەرىكتەسى جانە قازاق-ارميان بايلانىستارى ەش قيىندىقسىز, سىندارلى كوزقاراسپەن دامۋدا جانە ءبىر-ءبىرىنىڭ مۇددەلەرىن ەسكەرۋگە دايىن. مەن ەكى حالىقتىڭ يگىلىگى ءۇشىن بارلىق ۋاعدالاستىقتى ىسكە اسىرۋ ماقساتىندا ەڭ تىعىز ءوزارا ءىس-قيمىلعا دايىن ەكەنىمدى بىلدىرەمىن», دەدى م.نۇرتىلەۋ.
ەكى ەلدىڭ بيزنەس-توپتارىنىڭ ىسكەرلىك بايلانىستاردى دامىتۋعا قاتىسۋىنىڭ ماڭىزى اتالىپ ءوتتى. بۇگىنگى تاڭدا ارمەنيادا قازاقستاندىق كاپيتالدىڭ قاتىسۋىمەن 100-دەن اسا كاسىپورىن, ال قازاقستاندا 430-دان اسا ارميان كومپانياسى تىركەلگەن.
ارمەنيا ءسىم باسشىسى وتكەن جىل ءبىزدىڭ مەملەكەتتەر اراسىنداعى ەكىجاقتى قارىم-قاتىناس تاريحىنداعى ماڭىزدى كەزەڭ بولعانىن مالىمدەدى. ول جوعارى دەڭگەيدەگى ساپارلارعا, سونداي-اق كوپتەگەن بىرلەسكەن ءىس-شاراعا تولى بولعانىن اتاپ ءوتتى.
«بۇل ءارتۇرلى سالاداعى ءوزارا ءىس-قيمىلعا قاجەتتى سەرپىن بەردى. مەملەكەتتەرىمىز ەگەمەندىك پەن تاۋەلسىزدىكتى نىعايتۋعا, سونداي-اق ترانزيتتىك الەۋەتتى ارتتىرۋعا جانە ۇلتتىق ەكونوميكالاردى جاڭعىرتۋعا ۇمتىلۋدا ءبىرتۇتاس ەكەنىن بايقاتتى. مۇنىڭ ءبارى سەرىكتەستىك قارىم-قاتىناستى كەڭەيتۋ ءۇشىن بەرىك نەگىز جاسايدى. ەرەۆان مەن استانا حالىقارالىق جانە وڭىرلىك كۇن تارتىبىندەگى نەگىزگى ماسەلەلەر بويىنشا ءجيى سايكەس نەمەسە ۇقساس ۇستانىمدارعا يە», دەدى ا.ميرزويان.
تاراپتار ينۆەستيتسيالىق بايلانىستاردى ودان ءارى نىعايتۋعا جاردەمدەسۋگە ۋاعدالاستى. ارميان ەكونوميكاسىنا قازاقستاندىق كاپيتال سالىمدارىنىڭ جالپى كولەمى 56 ملن دوللاردان اسادى.
مادەني-گۋمانيتارلىق ىنتىماقتاستىقتىڭ دا مازمۇندى كۇن ءتارتىبى اتالىپ ءوتتى. مەملەكەت باسشىلارىنىڭ قاتىسۋىمەن وتكەن جىلى قازاقستاندا ارمەنيانىڭ مادەنيەت كۇندەرى ءوتتى. بيىل قازاقستاننىڭ ارمەنياداعى مادەنيەت كۇندەرى مادەني الماسۋدىڭ وڭ تاجىريبەسىن جالعاستىرادى.