بۇگىن سەناتورلار دەنە شىنىقتىرۋ جانە سپورت ماسەلەلەرى, سونداي-اق زاڭناماداعى ارتىق رەتتەۋدى الىپ تاستاۋعا قاتىستى زاڭدى قارادى. پارلامەنت سەناتىنىڭ سپيكەرى ماۋلەن اشىمباەۆ وسىعان بايلانىستى سپورتتىڭ باسىم تۇرلەرىن انىقتاۋ پاراسپورتتى قارجىلاندىرۋعا قالاي اسەر ەتەتىنى جانە زاڭناماداعى جاڭا نورمالاردىڭ پاراسپورتشىلارعا اسەرى جونىندە سۇراق قويدى, دەپ حابارلايدى Egemen.kz.
ماۋلەن اشىمباەۆ پاراسپورتشىلار الەۋمەتتىك جەلىلەردە قارجىلاندىرۋ ماسەلەسىنە قاتىستى الاڭداۋشىلىق بىلدىرگەنىن اتاپ ءوتتى. ول قابىلداناتىن كەز كەلگەن شەشىمنىڭ سالدارىن مۇقيات زەردەلەۋ قاجەت ەكەنىن ايتتى. ەڭ الدىمەن, دەنە شىنىقتىرۋ جانە سپورت ماسەلەلەرىنە قاتىستى زاڭ, سونداي-اق, زاڭناماداعى شامادان تىس رەگلامەنتتەۋدى الىپ تاستاۋ پاراسپورتشىلاردىڭ مۇمكىندىكتەرىن شەكتەمەۋگە ءتيىس ەكەنىن تىلگە تيەك ەتتى. وسىعان بايلانىستى پالاتا سپيكەرى سەناتورلاردى اتالعان ماسەلەنى باقىلاۋدا ۇستاۋعا شاقىردى.
سونىمەن قاتار سەنات توراعاسى ەلىمىزدە پاراليمپيادا باعدارلاماسىنا كىرمەيتىن سپورت تۇرلەرىنىڭ دە نازاردان تىس قالماۋى كەرەكتىگىن ايتتى. ول, اسىرەسە, اربادا وتىرىپ بيلەۋ سەكىلدى تانىمال سپورت تۇرلەرىن قولداۋدىڭ ماڭىزدىلىعىن اتاپ ءوتتى.
«ولاردىڭ ىشىندە اربادا وتىرىپ بيلەۋمەن اينالىساتىن ازاماتتارىمىز بار. بۇل – پاراسپورتتىڭ كەڭ تارالعان ءتۇرى. سوندىقتان سەناتتىڭ ءتيىستى كوميتەتى وسى ماسەلەنى باقىلاۋدا ۇستايدى جانە بۇل زاڭ ولارعا شەكتەۋ جاساماۋى كەرەك. پاراسپورتتىڭ باسقا تۇرلەرىن قارجىلاندىرۋ دا توقتاپ قالماۋى قاجەت. بۇل – وتە نازىك ماسەلە. مەن ءسىزدىڭ (تۋريزم جانە سپورت مينيسترلىگى وكىلىنىڭ) ويىڭىزدى ءتۇسىنىپ وتىرمىن. ارقاشان باسىمدىقتار بولۋى كەرەك, نازار اۋدارۋ مەن قارجىلاندىرۋ تۇرعىسىندا ناقتى قاراعان ءجون. سونىڭ ىشىندە پاراسپورتقا اسا مۇقيات بولۋعا ءتيىسپىز. بۇل جەردە ءبىراز ماسەلە بار. ءارى قاراي, قۇقىق قولدانۋ بارىسىندا قاراستىرىپ, قاجەت بولعان جاعدايدا زاڭنامانى جەتىلدىرەمىز. كەيبىر ماسەلەلەر زاڭنان كەيىنگى اكتىلەرمەن رەتتەلۋى مۇمكىن», دەدى ماۋلەن اشىمباەۆ تۋريزم جانە سپورت ءمينيسترىنىڭ ورىنباسارى سەرىك جاراسباەۆقا.