قاراشوكەەۆ زەرەك وقۋشىلارعا العىس ءبىلدىردى

ۇلتتىق كيىم كيگەن ءبىلىم الۋشىلاردى وبلىس اكىمى اپپاراتى باسشىسىنىڭ ورىنباسارى جانبولات نۇرمولدا ۇلى قارسى الىپ, ءوڭىردىڭ باس عيماراتى تۋرالى ءتۇرلى دەرەكتەرمەن ءبولىسىپ, وقۋشىلارعا ەكسكۋرسيا جۇرگىزدى.  كەيىننەن ءوڭىر باسشىسى كىتاپقۇمار وقۋشىلارمەن كەزدەسىپ, زياتكەرلىك ويىندا توپ جارعان وقۋشىلارعا تولايىم تابىس تىلەدى.

«كوركەم ادەبيەت – ءاربىرىمىز ءۇشىن جاڭا الەمنىڭ ەسىگىن اشاتىن, وي-ءورىستى كەڭەيتەتىن, جۇرەكتى مەيىرىم شۋاعىمەن نۇرلاندىراتىن قۇندىلىق. ءاربىر وقىلعان جاڭا كىتاپ سىزدەردىڭ زەيىنىڭىزدى اشا تۇسەتىنى انىق. كىتاپ وقىعان ادام قاي كەزدە دە وزىق ويىمەن دارالانادى. سوندىقتان دا كىتاپ وقۋدى ەشقاشان توقتاتپاي, جاڭا بيىكتەردى باعىندىرا بەرىڭدەر», دەدى ءوڭىر باسشىسى ءوز سوزىندە.

ءوز كەزەگىندە بىلىممەن قارۋلانعان وقۋشىلار ءوڭىر باسشىسىنا ريزاشىلىعىن جەتكىزىپ, بۇل كەزدەسۋ ولاردىڭ ىزدەنىس ىزىنە تۇسۋىنە سەرپىن بەرەتىنىن ايتتى. كەزدەسۋ بارىسىندا ە. قاراشوكەەۆ كىتاپقۇمار جاسوسپىرىمدەرگە ارنايى العىس حات جانە مۇحتار اۋەزوۆتىڭ «اباي جولى» رومان-ەپوپەياسىن تابىستادى.  

ەسكە سالا كەتەيىك, جامبىل وبلىسى اكىمدىگى مەن «جامبىل وبلىسى ازاماتتىق اليانسى» زاڭدى تۇلعالار بىرلەستىگى دەمەۋشىلەردى تارتا وتىرىپ, 18 قاڭتاردا «وي شەبەرى» زياتكەرلىك ويىنىن ۇيىمداستىردى. وعان تاراز قالاسى مەن اۋدانداردان 90 كوماندا (450 وقۋشى) قاتىستى. ءبىلىم بايگەسىنە قاتىسۋشىلارعا وڭىردەن شىققان تانىمال جازۋشىلار مەن اقىنداردىڭ شىعارمالارىنا قاتىستى سۇراقتار قويىلدى. ناتيجەسىندە بايزاق, مەركى, سارىسۋ اۋداندارىنىڭ نامىسىن قورعاعان مەكتەپ وقۋشىلارى توپ جاردى. جەڭىمپاز 3 كومانداعا قارجىلاي سەرتيفيكات تابىستالعان بولاتىن. 

6 كەزەڭنەن تۇراتىن تارتىستى باسەكەگە قاتىسۋشىلاردىڭ اراسىندا 300 كىتاپ وقىعان اسقار نۇرماحان, اقيىق اقىن مۇقاعالي ماقاتاەۆتىڭ 250 ولەڭىن جاتقا بىلەتىن كاۋسار قاشقىنباي, جۇزدەن استام كىتاپتىڭ تەرەڭىنە بويلاعان نۇرتىلەۋ ساتىبالدى سەكىلدى جاس ورەندەر بار.

جامبىل وبلىسى