ورال. 10 اقپان. ورال قالاسىندا ۇشقىشتىڭ بولۋىن قاجەت ەتپەيتىن ۇشۋ اپپاراتىنىڭ تانىستىرىلىمى وتكىزىلدى. بۇل تۋرالى egemen.kz ءتىلشىسى حابارلادى.
ۇشاقتى سەريالى تۇردە شىعارۋ ءىسىن «ومەگا» پريبور جاساۋ زاۋىتى بيلىعى جىلدىڭ وزىندە باستاماق. وسى كۇردەلى دە قاجەتتى ءىس جۇيەلى جولعا قويىلعان كەزدە قازاقستان ۇشقىشسىز ۇشاتىن اۋە ءوندىرىسىن مەڭگەرگەن الەمدەگى ءتورتىنشى ەلدىڭ قاتارىنا قوسىلماق. ياعني, ەلىمىزدىڭ الدىنا رەسەي, اقش جانە يزرايل مەملەكەتتەرى عانا شىقپاق.
اتالعان كەشەندى اۋە قوندىرعىسى رەسەيدىڭ موسكۆا وبلىسىنداعى قولدانبالى ەلەكترو-ديناميكا عىلىمي ورتالىعىندا جاسالعان. ونى اسكەري ءارى ءارتۇرلى ازاماتتىق ماقساتتارعا قاتار قولدانا بەرۋگە بولادى. سونىڭ ىشىندە ۇشاقسىز اپپاراتتى شەكارا قىزمەتىندە, اۋىل شارۋاشىلىعىندا جانە توتەنشە جاعدايلاردىڭ الدىن الۋ كەزىندە پايدالانۋ وتە ءتيىمدى ەكەن. بۇل جونىندە رەسەيلىكتەرمەن وسى ورتاق جوبانى بىرلەسىپ قولعا العان «مير ماسەل» جشس-نىڭ ديرەكتورى اباي رىسقاليەۆ بىلاي دەدى: «ۋاز اۆتوكولىگىنە ورناتىلعان كومپيۋتەرلەر ۇشقىشسىز اپپارات بەرەتىن اقپاراتتاردى قابىلداپ كەلەڭسىز جاعدايلاردى انىقتاپ بەرە الادى. بۇل قوندىرعىنىڭ ارتىقشىلىعى – ادام اياعى بارا المايتىن جەرلەرگە اۋەدەن قالىقتاپ تۇسۋىندە. وسى جوباعا ساي ءبىز بولاشاقتا «ومەگا» زاۋىتى عيماراتىنان وقۋ ورتالىعىن اشۋدى كوزدەپ وتىرمىز.
ماسەلەنىڭ ءمانىسى مىنادا. ەلىمىز 2006 جىلدان ۇشاقسىز اۆياتسيا ءوندىرىسىن دامىتۋ ماسەلەسىن العا قويعانى ءمالىم. وسى ىسكە ۇلكەن سەرپىن بەرگەن وتكەن جىلى اتىراۋ قالاسىندا رەسەي مەن قازاقستان پرەزيدەنتتەرى قاتىسۋىمەن وتكىزىلگەن شەكارالاس وبلىستار باسشىلارىنىڭ كەزدەسۋى. وسى باسقوسۋدا اتالعان كەشەننىڭ مۇمكىندىكتەرى جان-جاقتى تالقىلاندى. سونداي-اق كەلىسىمدەر ناتيجەسىندە ۇشقىشسىز ۇشۋ اپپاراتى ءوندىرىسىن وركەندەتۋ جونىندە شەشىم الىندى. قازاقستانداعى «ومەگا» پريبور جاساۋ زاۋىتى مەن ماسكەۋلىك راديوەلەكترونيكا ورتالىعى اراسىنداعى قول قويىلعان مەموراندۋم اتىراۋداعى كەزدەسۋدىڭ جاڭعىرىعى دەۋگە بولادى.
تاعى ءبىر ايتا كەتەرلىك ءجايت, سەرۆيستىك ورتالىق تا قازاقستاندىق قالادا ورنالاسپاق. وعان قاجەتتى جيناقتاۋشى ماتەريالدار رەسەيدەن جەتكىزىلمەك. جوبانىڭ تۇپكى باستاۋىندا قازاقستاندىق ۇلەس وتىز پايىز توڭىرەگىندە بولسا, ۋاقىت وتە كەلە بۇل كولەم ودان ءارى ۇلعايماق. سونىمەن بىرگە ەكى جاقتى قول قويۋشىلار كادرلەر ازىرلەۋ ماسەلەلەرىن دە نازاردان تىس قالدىرماعان.
تەمىر قۇسايىن.
دەرەك: egemen.kz.
سۋرەت: diapazon.kz.