تۇركىستان وبلىسى شاردارا اۋدانى جاۋشىقۇم اۋىلىنداعى جگقس-تا بولعان جارىلىس سالدارىنان ەكى ادام زارداپ شەگىپ, ءۇش ادام اۋرۋحاناعا تۇسكەن. كەيىن مەديتسينا مەكەمەسىنە جەتكىزىلگەن ۇشەۋدىڭ بىرەۋى قايتىس بولعانى تۋرالى اقپارات تارادى, دەپ حابارلايدى Egemen.kz.
تجد اقپاراتى بويىنشا, جانارماي-گاز قۇيۋ ستانتسياسىندا جارىلىس 21 ناۋرىز كۇنى جەڭىل اۆتوكولىكتىڭ جانارماي ستانتسياسىنا كەلىپ سوعىلۋىنان بولعان.
- سونىڭ سالدارىنان ىدىستان گاز شىعىپ, ول اۋامەن ارالاسىپ تۇتاندى. ءورت جاقىن جەردە تۇرعان كولىكتى شارپىدى, - دەلىنگەن حابارلامادا.
جارىلىستان ەكى ادام وقيعا ورنىندا قازا تاۋىپ, ءۇش تۇرعىندى كۇيىك شالدى. ولار شۇعىل تۇردە اۋرۋحاناعا جەتكىزىلدى.
توتەنشە جاعدايلار قىزمەتىنىڭ ماماندارى ءورتتى ءسوندىردى.
كەيىن تۇركىستان وبلىستىق دەنساۋلىق ساقتاۋ باسقارماسى مەديتسينا مەكەمەسىنە جەتكىزىلگەن ءۇش ادامنىڭ بىرەۋى قايتىس بولعانىن حابارلادى. ول 22 ناۋرىز كۇنى كوز جۇمعان. قالعان ەكەۋى حيرۋرگيا بولىمشەسىندە ەم-دوم الىپ جاتىر, جاعدايلارى ورتاشا. كەڭەس الۋ ءۇشىن كومبۋستيولوگ پەن رەانيماتولوگ شاقىرىلدى.