اقتوبە. 10 اقپان. وبلىس ورتالىعىنداعى «قازپوشتا» اكتسيونەرلىك قوعامى اقتوبە فيليالىنىڭ №19 بولىمشەسى جاڭارتىلدى. بۇل تۋرالى egemen.kz ءتىلشىسى حابارلادى.
پوشتا بايلانىس بولىمشەسىنىڭ اشىلۋ سالتاناتىنا قاتىسقان «قازپوشتا» اق باسقارماسىنىڭ توراعاسى باعدات مۋسين ەلىمىزدىڭ جەتى قالاسىندا «قازپوشتانىڭ» جاڭعىرتىلعان قالالىق پوشتا بايلانىس بولىمشەلەرى اشىلعانىن جەتكىزدى. ول قىزمەتكەرلەردىڭ جۇمىس ورنىن جاقسارتۋمەن بىرگە, مۇمكىندىگى شەكتەۋلى جانە سابيلەرىن قولاربامەن الىپ جۇرەتىن جاس انالاردىڭ كىرۋىنە ىڭعايلى بولۋى ءۇشىن پاندۋستار ورناتىلعانىن, تۇتىنۋشىلار ءۇشىن كەڭ زالعا جاڭا جۇمساق جيھازدار قويىلعانىن, بولىمشەلەردە ءبىر دەڭگەيلى, ياعني كەدەرگىسىز قىزمەت كورسەتىلەتىنىن اتاپ ءوتتى.
باسقارما توراعاسىنىڭ ايتۋىنشا, بارلىق جاڭارتىلعان پوشتا بايلانىس بولىمشەلەرى تاۋلىك بويى جۇمىس ىستەيدى, ولار بىرىڭعاي ەلەكتروندى كەزەك جۇيەسىمەن, بەينە قاداعالاۋ جانە ءورت قاۋىپسىزدىگىمەن قامتاماسىز ەتىلگەن. بولاشاقتا مۇندا «POST 24» وزىنە-ءوزى قىزمەت ەتۋ بولمەسى اشىلىپ, قارجى قىزمەتى بويىنشا بانكوماتتار مەن تولەم تەرمينالدارى, ال پوشتا قىزمەتتەرى بويىنشا ابونەمەنتتىك جاشىكتەر, پوستاماتتار قويىلادى. الداعى ۋاقىتتا «قازپوشتانىڭ» اقتوبە قالاسىنداعى قالعان 21 بولىمشەسى دە جاڭارتىلماق.
ساتىبالدى ءساۋىرباي.
دەرەك: egemen.kz.
سۋرەت: diapazon.kz.