قازاقستاندا ينۆەستيتسيالار تۋرالى جاسالعان كەلىسىم شەڭبەرىندە اممياك پەن كارباميد وندىرەتىن زاۋىت قۇرىلىسى باستالادى. پرەمەر-مينيستر ولجاس بەكتەنوۆ ءتيىستى قاۋلىعا قول قويدى.
بيىلعى 4 ناۋرىزدا «ESTA Construction» كومپانياسىنىڭ باسشىلىعىمەن كەزدەسۋ بارىسىندا پرەمەر-مينيستر جاۋاپتى مينيسترلىكتەرگە ەكى اپتا ىشىندە تىڭايتقىشتار شىعاراتىن زاۋىت سالۋ ءۇشىن ينۆەستيتسيالار تۋرالى كەلىسىمگە قول قويۋعا دايىنداۋدى تاپسىردى.
جوبانى «QazaqGaz» جانە «ESTA» بىرلەسكەن كاسىپورنى — «Qazesta Fertilizers LTD» كومپانياسى بازاسىندا ىسكە اسىرۋ جوسپارلانىپ وتىر. زاۋىتتىڭ ورنى رەتىندە ماڭعىستاۋ وبلىسى تاڭدالدى, بۇل ونىمدەردى كاسپي تەڭىزى ارقىلى ەكسپورتتاۋعا وڭتايلى جاعدايلاردى قامتاماسىز ەتەدى. «Esta Construction» الەمدەگى ەڭ ۇزدىك 100 قۇرىلىس كومپانياسىنىڭ قاتارىنا كىرەدى.
جوبانىڭ قۇنى – 1,35 ملرد دوللار. قۇرىلىستى ءۇش جارىم جىلدا اياقتاۋ جوسپارلانىپ وتىر. ىسكە اسىرۋ كەزەڭىندە 3 مىڭعا دەيىن ادام تارتىلىپ, قۇرىلىس اياقتالعاننان كەيىن 400 تۇراقتى جۇمىس ورنى اشىلادى.
زاۋىتتىڭ وندىرىستىك قۋاتى جىلىنا 700 مىڭ تونناعا دەيىن كارباميدتى جانە 42 مىڭ توننا اممياكتى قۇرايدى.
جوبا گاز حيمياسى سالاسىن دامىتۋعا, سونداي-اق يمپورتتى الماستىرۋعا جانە قوسىلعان قۇنى جوعارى ونىمدەردى دايىنداۋعا باعىتتالعان.
قازىرگى ۋاقىتتا قازاقستاندا تىڭايتقىشتاردىڭ ءۇش ءتۇرىن ءوندىرۋ جولعا قويىلعان: اممياك سەليتراسى, امموفوس جانە امموني سۋلفاتى. 3,2 ملن توننا عىلىمي قاجەتتىلىك كەزىندە وتاندىق قۋاتتار سۇرانىستىڭ جارتىسىنا جۋىعىن عانا قامتاماسىز ەتەدى. كارباميد ءوندىرىسىن قۇرۋ جونىندەگى جوبانى ىسكە اسىرۋ يمپورتقا تاۋەلدىلىكتى ازايتۋعا جانە ەلىمىزدىڭ ازىق-ت ۇلىك قاۋىپسىزدىگىن نىعايتۋعا مۇمكىندىك بەرەدى. سونداي-اق اۋىل شارۋاشىلىعىنىڭ دامۋىنا وڭ اسەر ەتەدى.