قازاقستاندا ەرىكتىلەردىڭ ءومىرى مەن دەنساۋلىعىن ساقتاندىرۋ جوسپارلانىپ وتىر. بۇل تۋرالى پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا دەپۋتاتتىق ساۋالعا بەرگەن جاۋابىندا مالىمدەدى, دەپ جازادى Egemen.kz.
18 ناۋرىزدا ءماجىلىس دەپۋتاتى نيكولاي ارسيۋتين ەرىكتىلەرگە قوسىمشا الەۋمەتتىك قولداۋ شارالارىن قاراستىرۋدى ۇسىنعان. ونىڭ ىشىندە ءومىردى ساقتاندىرۋ ماسەلەسى دە بار. بالاەۆانىڭ ايتۋىنشا, بۇل باستاما قازىر قاراستىرىلىپ جاتىر.
«مۇددەلى مەملەكەتتىك ورگاندارمەن بىرلەسىپ, توتەنشە جاعدايلاردىڭ سالدارىن جويۋعا, جوعالعان ادامداردى ىزدەۋگە جانە ءومىرى مەن دەنساۋلىعىنا ناقتى قاۋىپ تونەتىن وزگە دە قىزمەت تۇرلەرىنە قاتىساتىن ەرىكتىلەردىڭ ءومىرى مەن دەنساۋلىعىن ساقتاندىرۋ ماسەلەسى قارالىپ جاتىر. ۇسىنىلىپ وتىرعان شارالار 2030 جىلعا دەيىنگى ۆولونتەرلىكتى دامىتۋ جونىندەگى جاڭا تۇجىرىمدامادا كورىنىس تابادى», دەلىنگەن جاۋاپتا.
سونداي-اق ارسيۋتين ۆولونتەرلىك قىزمەت كەزەڭىن ەڭبەك وتىلىنە ەسەپتەۋ ماسەلەسىن دە كوتەرگەن. ۆيتسە-پرەمەر بۇل ماسەلە 2022 جىلى دا قارالعانىن اتاپ ءوتتى. الايدا ەڭبەك جانە حالىقتى الەۋمەتتىك قورعاۋ مينيسترلىگى بۇل ۇسىنىستى قولداماعان.
ايدا بالاەۆانىڭ ايتۋىنشا, حالىقارالىق تاجىريبەدە دە ۆولونتەرلىك قىزمەت ەڭبەك وتىلىنە تەڭەستىرىلمەيدى.