ناۋرىزنامانىڭ ونكۇندىگى اياسىندا شىمكەنتتە كوپتەگەن يگى ءىس-شارا ءوتىپ جاتىر. سونىڭ ءبىرى – جاڭارۋ كۇنىنە وراي مارتوبە تۇرعىن الابىندا وتكەن ەكولوگيالىق سەنبىلىك. بۇل ءىس-شارا قازاقستان حالقى اسسامبلەياسىنىڭ 30 جىلدىعى اياسىندا قولعا الىندى. وسىعان وراي «مارتوبە» تاريحي كەشەنىندە «مادەني مۇرا» ەكولوگيالىق اكتسياسى ۇيىمداستىرىلدى.
قازاق حاندىعىنىڭ تۇسىندا بۇل جەرگە جىل سايىن حان-سۇلتاندار, بي-شەشەندەر مەن باتىرلار جيىلىپ, ەلدىڭ تىنىشتىعىن ساقتاۋ, كوشى-قون ءتارتىبىن رەتتەۋ, جاۋدان قورعانۋ, باسقا دا ماڭىزدى ماسەلەلەردى تالقىلاعان. وسى جەردە قابىلدانعان «جەتى جارعى» زاڭدار جيناعى ەلدىڭ بىرلىگىن نىعايتىپ, قازاق حالقى تاريحىندا قابىلدانعان العاشقى كونستيتۋتسياسى بولدى دەسەك قاتەلەسپەيمىز.
اكتسيا بارىسىندا قازاقستان حالقى اسسامبلەياسىنىڭ مۇشەلەرى, ەتنومادەني بىرلەستىكتەردىڭ باسشىلارى, زيالى قاۋىم وكىلدەرى, ستۋدەنتتەر مەن قالا تۇرعىندارى «مارتوبە» تاريحي كەشەنىنىڭ اۋماعىندا تازالىق جۇمىستارىن جۇرگىزىپ, اباتتاندىرۋعا اتسالىستى. قالالىق قحا جانىنداعى اقساقالدار كەڭەسىنىڭ مۇشەسى دوسىباي شەرىمقۇلوۆ اكتسيانىڭ ماڭىزدىلىعى تۋرالى اتاپ ءوتىپ, جينالعان جۇرتشىلىقتى ناۋرىز مەرەكەسىمەن قۇتتىقتادى.
«مارتوبە – حالىقتىق بيلىكتىڭ قاينار كوزى ءارى دالا پارلامەنتىنىڭ ءرولىن اتقارعان قاسيەتتى ورىن. قازاق حاندىعى كەزەڭىندە مۇندا «جەتى جارعى» زاڭدار جيناعى قابىلدانعانى تاريحتان بەلگىلى. ول كەيىن قازاق حالقىنىڭ تۇرمىس سالتىنداعى قۇقىقتىق قاتىناستاردىڭ تۇزىلۋىنە ۇلكەن جول اشتى. زاڭ-ەرەجەلەر ارقىلى ەلىمىزدىڭ بىرلىگى نىعايىپ, ءبىرتۇتاس ءتارتىپ ورنادى. جاسىراتىنى جوق, كەشەگى سول تاريحي قۇجات نەگىزىندە ەلدىگىمىزدى ايعاقتايتىن قازىرگى كونستيتۋتسيامىز قالىپتاستى. مارتوبە ءبىزدىڭ تاۋەلسىزدىگىمىز بەن بىرلىگىمىزدىڭ تۇعىرلى بەلگىسى رەتىندە قاستەرلەنۋگە ءتيىس. سوندىقتان مادەني ەسكەرتكىشتىڭ قالپىن بۇزباي ونىڭ تاريحتاعى ءرولىن, رۋحاني قۇندىلىعىن كەلەر ۇرپاققا جەتكىزۋ – باستى مىندەتىمىز. سونىمەن بىرگە بارشا اعايىندى ءداستۇرلى مەرەكەمەن قۇتتىقتايمىن», دەدى ەڭبەك ارداگەرى.