بۋرابايدا وتكەن ۇلتتىق قۇرىلتايدا مەملەكەت باسشىسى قاسىم-جومارت توقاەۆ تۋريزم ايماقتاردىڭ دامۋىنا سەرپىن بەرەتىن سالاعا اينالۋعا ءتيىس ەكەنىن اتاپ ءوتتى. وڭىرلەردە وتەتىن ەلىشىلىك ءھام حالىقارالىق ءىس-شارالار سول ءوڭىردىڭ تۋريستىك الەۋەتىنىڭ ارتۋىنا ىقپال ەتەتىنىن ايتتى.
«تۋريزم – بيزنەس پەن ەكونوميكانىڭ تۇتاس سالاسى. مامانداردى دايارلاۋ قاجەت. تابيعي بايلىعىمەن, جان-جانۋارلار دۇنيەسىمەن بۇكىل الەمگە تانىمال ەلىمىزدىڭ بيولوگيالىق ارالۋاندىعىن قورعاۋ ايرىقشا ماڭىزدى مىندەتكە اينالدى. اقمولا وبلىسىنىڭ وراسان زور تۋريستىك الەۋەتى شۋچينسك – بۋراباي اۋماعىمەن عانا شەكتەلمەيدى. دەمالىس ايماعى رەتىندە مۇمكىندىگى مول زەرەندى, ساندىقتاۋ, اقكول جانە باسقا دا جەرلەردى جان-جاقتى دامىتۋ قاجەت. ايماقتاعى كورىكتى ءارى كيەلى ورىنداردىڭ ءبارى ءوزارا كىرىكتىرىلىپ, ۇيلەستىرىلگەن اۋقىمدى تۋريستىك كلاستەر قالىپتاستىرۋ ماڭىزدى», دەدى پرەزيدەنت.
مەملەكەتتىڭ دامۋىنا زور قارقىن قوساتىن بۇل سالادا ءالى دە اتقارىلار شارۋا جەتكىلىكتى. وسى سالانى ورىستەتۋ ارقىلى وڭىرلەردە جاڭا جۇمىس ورنىن اشۋدىڭ مۇمكىندىگى دە مول. شالعايداعى اۋىلداردا ءىرى ءوندىرىس ورنى, زاۋىتتاردىڭ سالىنا بەرمەيتىنى بەلگىلى. سول اۋىلداردىڭ تۇمسا تابيعاتى, تاريحي, مادەني ورىندارى تۋريستەردىڭ كوپتەپ كەلەتىن تۇراعىنا اينالۋى مۇمكىن. ءار كەلگەن ءتۋريستىڭ تولەيتىن قاراجاتى اۋىل بيۋدجەتىنە تۇسەدى. الەمدىك تاجىريبەدە مۇنداي ءتاسىل ەرتەدەن قولدانىلادى. ەلىمىزدە كەيىنگى 7-8 جىلدىڭ ىشىندە عانا قارقىندى دامىپ, قولعا الىنا باستادى. ونىڭ جارقىن مىسالى – الماتى وبلىسى كەگەن اۋدانىنداعى ساتى اۋىلى. ايگىلى كولساي كولدەرىنە ىرگەلەس ورىن تەپكەن اۋىل بىلتىر دۇنيەجۇزىلىك تۋريستىك ۇيىمنىڭ (UNWTO) ۇزدىك اۋىل اتالىمىن الدى. بۇل اۋىلدا بىرنەشە قوناقۇي بار, ودان سىرت, تۇرعىنداردىڭ بارلىعى دەرلىك تۋريزم سالاسىندا نەسىبەسىن تاۋىپ وتىر. وسى مودەلدى ەلىمىزدىڭ وزگە وڭىرلەرىنە دە ەنگىزۋ ماقساتىندا ءتۇرلى ەكسپەديتسيالىق ساپار, سەمينار ۇيىمداستىرامىز. جىلدا اۋىلداردى ارالاپ, جەرگىلىكتى حالىقپەن جۇزدەسىپ, تۋسىراپ جاتقان دالاعا تۋريزم تامىر تارتسا, تابىس كوزى اشىلاتىنىن ايتامىز. تۇرعىنداردىڭ وقۋ كۋرستارىنان وتۋىنە جاعداي جاسايمىز. قوناقۇي بيزنەسى, تۋريزم سەرۆيسىن زامان تالابىنا ساي نىعايتۋعا جول سىلتەيمىز. بۇگىندە وسىنداي سەمينار, ترەنينگكە قاتىسىپ, بىلىكتىلىگىن ارتتىرعان اۋىل تۇرعىندارىنىڭ سانى مىڭعا جەتتى. ەلۋگە تارتا جاڭا تۋريستىك ورىن اشىلىپ, كەلۋشىلەردىڭ قىزىعۋشىلىعىن ارتتىردى.
مەملەكەت باسشىسى ۇلتتىق قۇرىلتايدا اتاپ وتكەندەي, وڭىرلەردە ءتۋريزمدى دامىتۋ باعىتىنداعى ماڭىزدى ءىس-شارالاردى جۇيەلى ۇيىمداستىرۋ كەرەك. بۇل رەتتە ويىن-ساۋىقتىق جيىندار ەمەس, تۋريستەر تارتۋعا سەرپىن بەرەتىن ماعىنالى باسقوسۋلار ءجيى ءوتۋى كەرەك. تەك اۋىلدىق جەرلەردە ەمەس, ءىرى مەگاپوليس, وبلىس ورتالىقتارىندا وتەتىن ءىس-شارالار دا تۋريستەردى تارتۋدىڭ كوزى بولۋعا ءتيىس. مىسالى, تۇركىستان قالاسى تۋريستىك مەكەن بولعانىنا قاراماستان, كۇزدىڭ سوڭى, قىسقا قاراي تۋريستەر ازايادى. ونىڭ سالقىنى قوناقۇيلەرگە, باسقا دا تۋريستەر ارالايتىن ورىندارعا ايتارلىقتاي اسەر ەتەدى. كۇز مەزگىلىنىڭ اياعىنا قاراي وتەتىن تۇركىستان مارافونى وسى ولقىلىققا ايتارلىقتاي جاماۋ بولىپ كەلەدى. 2 مىڭنان اسا قاتىسۋشى قالاعا جان-جاقتان جينالادى. كەلگەن قوناقتار كوبىنە قوناقۇيلەرگە توقتايدى. مىنە, وسىنداي اۋقىمدى شارالاردى ءار قالادا وتكىزۋ ارقىلى دا تۋريستەردى تارتۋعا بولادى.
دانيەل سەرجان ۇلى,
«Kazakh Tourism» ۇك» اق باسقارما توراعاسىنىڭ ورىنباسارى