مەديتسينالىق كومەك ساپاسى تۋرالى ايتقاندا, ءبىرىنشى كەزەكتە مامانداردىڭ بىلىكتىلىگىنە نازار اۋدارعان ءجون. مەديتسينالىق ۇيىمداردى قۇرال-جابدىقتارمەن قامتاماسىز ەتۋگە جەتكىلىكتى كوڭىل بولىنبەسە, ينفراقۇرىلىم جاقسارماسا, دارىگەرلەر پاتسيەنتتەرگە ءىس جۇزىندە ساپالى قىزمەت ۇسىنا المايدى.
وڭىرلەردى ارالاپ, تۇرعىندارمەن كەزدەسكەندە مەديتسينالىق قىزمەتكە قاتىستى سۇراقتارىن جاۋدىرىپ, نارازىلىق بىلدىرەتىندەر كوپ. تۇرعىندار ءالى كۇنگە دەيىن ەمحاناعا قارالۋ ءۇشىن اپتالاپ كەزەك كۇتۋگە ءماجبۇر. مەملەكەتتىڭ ءبىرىنشى بايلىعى – حالىق دەنساۋلىعى. سوندىقتان دەنساۋلىق ساقتاۋعا كەلگەندە قارجى ۇنەمدەۋ سالانى العا باستىرمايدى. مەملەكەت باسشىسى قاسىم-جومارت توقاەۆ ۇلتتىق قۇرىلتايدىڭ ءتورتىنشى وتىرىسىندا مەديتسينا ينفراقۇرىلىمىن بارىنشا دامىتۋ جۇمىستارى جالعاساتىنىن ايتتى. جىل سوڭىنا دەيىن «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 188 مەديتسينا نىسانى سالىنادى. وسىعان قوسا ريددەردە كوپبەيىندى اۋرۋحانا, وسكەمەندە گەماتولوگيا ورتالىعى, اقتاۋدا جەدەل جاردەم ستانساسى, الماتىدا جۇقپالى اۋرۋلار ۇلتتىق عىلىمي ورتالىعى, استانادا ۇلتتىق عىلىمي ونكولوگيا ورتالىعىنىڭ جاڭا عيماراتتارى پايدالانۋعا بەرىلەدى. كەلەر جىلى 32 اۋداندىق ورتالىق اۋرۋحانانى جاڭعىرتۋ, قىزىلوردا, ماڭعىستاۋ وبلىستارىنداعى اۋرۋحانالاردىڭ قۇرىلىسىن اياقتاۋ مىندەتى تۇر.
نەگىزى, «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا ەكى جىلدا تۇرعىندارعا العاشقى دارىگەرلىك كومەك كورسەتەتىن 460 نىسان پايدالانۋعا بەرىلگەن. بۇگىندە كوپبەيىندى ورتالىق اۋداندىق اۋرۋحانالاردى جاڭعىرتۋ جۇمىسى باياۋ ءجۇرىپ جاتىر. جوسپارعا سايكەس بيىل 32 اۋرۋحانا جوندەۋدەن وتۋگە ءتيىس بولسا, ونىڭ تەڭ جارتىسىنىڭ جوبالىق-سمەتالىق قۇجاتى ەندى عانا دايىندالىپتى. اتالعان مەكەمەلەردى مەديتسينالىق قۇرالدارمەن جابدىقتاۋ ماسەلەسى تاعى بار. سوندىقتان مەملەكەت باسشىسى قاسىم-جومارت توقاەۆ بۇل ماسەلەنى ۇلتتىق قۇرىلتايدا كوتەرىپ, ينفراقۇرىلىمعا قاتىستى قىرۋار جۇمىستى اياقتاۋ مەرزىمىن كەشىكتىرۋگە بولمايتىنىن ەسكەرتتى.
كەيىنگى ەكى جىلدا بىرقاتار قالادا ەرەكشە قاجەتتىلىگى بار ادامدارعا ارنالعان زاماناۋي وڭالتۋ ورتالىقتارى بوي كوتەرگەن. پرەزيدەنت كەلەر جىلدىڭ سوڭىنا دەيىن اقتوبەدە, اتىراۋدا, كوكشەتاۋدا, شىمكەنتتە, تالدىقورعاندا وسىنداي ورتالىقتار اشۋ كەرەك ەكەنىن ايتتى. بۇعان قوسا ءاربىر وبلىس ورتالىعىندا ەرەكشە قاجەتتىلىگى بار, سونىڭ ىشىندە اۋتيزمگە شالدىققان بالالاردى وڭالتۋ, دامىتۋ ورتالىقتارىن قۇرۋدى ۇسىندى. قازىر اۋتيزمگە شالدىققان بالالار كوبەيىپ بارادى. ولاردىڭ بارلىعى دەرلىك دەرتىنە شيپا ىزدەپ استاناعا بارادى. سوندىقتان مەملەكەت باسشىسىنىڭ ۇكىمەت پەن اكىمدەرگە ەرەكشە قاجەتتىلىگى بار, اۋتيزمگە شالدىققان بالالارعا ارنالعان نىساندار اشۋ ماسەلەسىنە دەرەۋ كىرىسۋدى تاپسىرعانى قۋانتادى. دەمەۋشىلەردىڭ, «قازاقستان حالقىنا» قورىنىڭ كومەگىمەن وسى ماڭىزدى جۇمىستا بەلگىلى ءبىر ىلگەرىلەۋ بايقالادى. كەلەشەكتە وسىنداي ورتالىقتار ءاربىر وڭىردە بولسا, بالالارعا ۇلكەن قولداۋ بولعالى تۇر.
قازىر ۇلتتىق جوبا اياسىندا اۋىلدىق جەرلەردە مەديتسينالىق مەكەمەلەر, پۋنكتتەر كوپتەپ سالىنىپ جاتىر. جاڭا نىساندار زاماناۋي قۇرال-قوندىرعىلارمەن جابدىقتالعان. دەنساۋلىعىن تەكسەرۋگە بۇرىن كورشى اۋىلداعى ەسكى نىساندارعا قاتىنايتىن كەيبىر اۋىلدىڭ تۇرعىندارى ەندى جاڭا ۇلگىدەگى نىساننىڭ قىزمەتىنە جۇگىنەتىن بولدى. دەگەنمەن الداعى اتقارىلاتىن جۇمىستاردىڭ اۋقىمى وتە كەڭ. ەڭ باستىسى, مەديتسينالىق مەكەمەلەردىڭ سانى عانا كوبەيمەي, كورسەتىلەتىن قىزمەتتىڭ ساپاسى دا ارتا تۇسسە ەكەن دەيمىز.
گۇلدارا نۇرىموۆا,
ءماجىلىس دەپۋتاتى