پرەزيدەنت جانىنداعى قازاقستاننىڭ ستراتەگيالىق زەرتتەۋلەر ينستيتۋتىندا «قازاقستاننىڭ بولاشاق كەلبەتى: سىن-قاتەرلەر مەن مۇمكىندىكتەر» تاقىرىبىندا ساراپتامالىق كەزدەسۋ ۇيىمداستىرىلىپ, وندا قسزي ديرەكتورى ەركىن تۇقىموۆتىڭ «قازاقستاننىڭ بولاشاعى: مۇمكىندىكتەردىڭ تار ءدالىزى» مونوگرافياسىنىڭ تۇساۋكەسەرى ءوتتى, دەپ جازادى Egemen.kz.
ساراپتامالىق كەزدەسۋ جەتەكشى عالىمداردىڭ, ساراپشىلاردىڭ, قوعام جانە باق وكىلدەرىنىڭ قاتىسۋىمەن اشىق پىكىرتالاس فورماتىندا ءوتتى.
كىتاپتىڭ مازمۇنىنا كەڭىرەك توقتالعان ەركىن تۇقىموۆ بۇل ەڭبەگى ەلىمىزدىڭ بولاشاعى تۋرالى ۇلكەن قوعامدىق پىكىرتالاستىڭ باستاۋى بولاتىنىنا سەنىم ءبىلدىردى.
«بۇگىنگى كۇنى ءبىز قانداي مەملەكەت پەن قوعام قۇرىپ جاتقانىمىز, ول ءۇشىن قانداي رەفورمالار قاجەت, قوعامىمىزدى قانداي قۇندىلىقتار بىرىكتىرەتىنى, ەكونوميكانى ءارتاراپتاندىرۋدىڭ جانە شيكىزاتتىق تاۋەلدىلىكتەن ارىلۋدىڭ قانداي جولدارى بار ەكەندىگى تۋرالى اشىق, شىنايى اڭگىمە وزەكتى بولىپ وتىر. بىزدە ەكونوميكانى, ساياساتتى, قوعامدىق سانانى باتىل رەفورمالاۋعا, جاڭعىرتۋعا ءالى ۋاقىت بار. بىراق ونى وتكىزىپ الماۋ ماڭىزدى, ويتكەنى تاعى 20-30 جىلعا كەشەۋىلدەۋ وتە جاعىمسىز ناتيجەلەرگە اكەلۋى مۇمكىن جانە مۇنى ازيا مەن افريكانىڭ كوپتەگەن ەلدەرىنىڭ تاجىريبەسى كورسەتىپ وتىر», دەدى ەركىن تۇقىموۆ.
كىتاپتىڭ ءبىرىنشى بولىمىندە جاھاندىق كونتەكستكە تالداۋ جاسالعان, ويتكەنى قازاقستان جاھاندانعان الەمنىڭ ءبىر بولىگى بولا وتىرىپ, سىرتتان, سونىڭ ىشىندە ىشكى ساياسي كۇن تارتىبىندە تىكەلەي ىقپالعا ۇشىرايدى.
ەكىنشى ءبولىم ەكونوميكالىق مۇمكىندىكتەر مەن شەكتەۋلەردى, اتاپ ايتقاندا, «ورتاشا كىرىس تۇزاعى» تاۋەكەلىن باعالاۋعا ارنالعان.
ءۇشىنشى بولىمدە قۇندىلىقتاردىڭ ءرولى مەن قازىرگى قوعامداعى ورنىن قوزعاي وتىرىپ, الەۋمەتتىك قاتىناستارعا تالداۋ جاسالادى.
سوڭىندا, سوڭعى ءتورتىنشى بولىمدە اۆتور وتكەننىڭ ساباقتارى مەن بولاشاققا ارنالعان كۇن ءتارتىبىن ەسكەرە وتىرىپ, قازاقستاننىڭ دامۋ مۇمكىندىكتەرىنىڭ «تار ءدالىزى» تۋرالى ءوز كوزقاراسىمەن بولىسكەن.
كىتاپتا بيلىكتى ورتالىقسىزداندىرۋ, جەرگىلىكتى ءوزىن-ءوزى باسقارۋدى دامىتۋ جانە قوعامنىڭ رەفورمالارعا دايىندىعى ماسەلەلەرى دە قوزعالادى.
تۇساۋكەسەردە ءسوز سويلەگەن قولدانبالى ەتنوساياسي زەرتتەۋلەر ينستيتۋتىنىڭ ديرەكتورى تالعات قاليەۆ مەملەكەتتىك باسقارۋ جۇيەسىندە, ۇلت قۇرىلىسىندا, بولاشاقتىڭ بەينەسىن قالىپتاستىرۋدا جوسپارلاۋ كوكجيەگىن كەڭەيتۋ قاجەتتىگىن اتاپ ءوتتى.
ال قسزي باس عىلىمي قىزمەتكەرى, الەۋمەتتانۋ عىلىمدارىنىڭ دوكتورى ايگۇل زابيروۆا ۇسىنىلىپ وتىرعان مونوگرافيا جاھاندىق سىن-قاتەرلەردى تالداۋدىڭ, ساياسي ەكونوميكالىق تالداۋدىڭ, تاريحي تۇسىنىك پەن وتاندىق قوعامنىڭ مادەني پورترەتىنىڭ نانىمدى ۇيلەسىمىن ۇسىناتىن قازاقستاندى زەرتتەۋ ەكەنىن اتاپ ءوتتى.
كەزدەسۋدە سونداي-اق ء«ادىل ءسوز» ءسوز بوستاندىعىن قورعاۋ حالىقارالىق قورىنىڭ جەتەكشىسى قارلىعاش جامانقۇلوۆا, «قوعامدىق پىكىر» زەرتتەۋ ينستيتۋتىنىڭ ديرەكتورى بوتاگوز راقىشەۆا, «Amanat» پارتياسى قوعامدىق ساياسات ينستيتۋتىنىڭ ديرەكتورى ءمادينا نۇرعاليەۆا, «جاستار» عىلىمي-زەرتتەۋ ورتالىعىنىڭ ديرەكتورى ولجاس بەيسەنباەۆ, قسزي باس عىلىمي قىزمەتكەرى, ساياسي عىلىمدارىنىڭ دوكتورى سانات كۇشكىمباەۆ ءسوز سويلەپ, اتالعان مونوگرافيادان اركىم ءوز نازارىن اۋداراتىن نارسە تابا الاتىنىنا سەنىم ءبىلدىردى, ويتكەنى وندا سىرتقى ساياسات, ۇلتتىق بىرەگەيلىك, مەملەكەت پەن قوعامدى جاڭعىرتۋ ماسەلەلەرىنىڭ اۋقىمى قوزعالادى.
ساراپتامالىق كەزدەسۋ سوڭىندا اۆتور پىكىرتالاسقا قاتىسۋشىلارعا العىسىن ءبىلدىرىپ, ايتىلعان ۇسىنىستار مەن ەسكەرتپەلەر الداعى زەرتتەۋلەر مەن پراكتيكالىق ۇسىنىستارعا نەگىز بولا الاتىنىنا سەنىم ءبىلدىردى.