سۋردولوگتاردىڭ مالىمەتىنە سۇيەنسەك, جىل سايىن ەلىمىزدە شىر ەتىپ دۇنيەگە كەلگەن 1400-گە جۋىق ءسابيدىڭ قۇلاعى ناشار ەستيتىنى, ءتىپتى كەيبىرى ساڭىراۋ بولىپ تۋعانى انىقتالىپ جاتادى. بۇعان دەيىن جاڭا تۋعان سابيلەردىڭ قۇلاعى قالاي ەستيتىنى قولمەن تەكسەرىلىپ, تىركەلىپ كەلسە, بۇل ەستۋ كەمىستىگى انىقتالعان بالالاردىڭ ودان ارعى تاعدىرىن قاداعالاۋ پروتسەسىنە تىكەلەي اسەر ەتەتىن ەدى.
ەندىگى جەردە الماتىداعى ەكى بىردەي پەرزەنتحانا مەن قوس ەمحانا سابيلەردىڭ ەستۋ قابىلەتىن تەرەڭ تەكسەرە الاتىن زاماناۋي اپپاراتتارعا يە بولىپ وتىر.
وسىلايشا, «مەن ەستيمىن» جوباسىنىڭ ارقاسىندا مەگاپوليستەگى « №5 قالالىق پەرزەنتحانا», «قالالىق پەريتانالدىق ورتالىق», «№10 قالالىق ەمحانا» مەن «№ 36 قالالىق ەمحانا» الىپ وتىرعان جاڭا جابدىقتار دۇنيەگە ەندى كەلگەن سابيلەردىڭ قۇلاعىنداعى مۇكىستى دەر كەزىندە انىقتاپ, دەر كەزىندە ەمدومىن باستاۋعا سەپتەسىپ, ساڭىراۋلىقتان ساقتاپ قالارى ءسوزسىز.
جاڭا مەديتسينالىق قۇرالدار ەندى تۋعان نارەستەلەردىڭ قۇلاقتارىنداعى بىردەن بىلىنە بەرمەيتىن, جاسىرىن كەمىستىگىن انىقتاپ, مۇگەدەكتىكتى ازايتا تۇسۋگە مۇمكىندىك بەرەتىندىكتەن, ەكى جىلدا الماتىدا 62 مىڭعا جۋىق ءسابي تەكسەرۋدەن وتە الادى دەگەن بولجام بار.
ءبىر جاعىنان «مەن ەستيمىن» قاناتقاقتى جوباسى الماتى قالالىق قوعامدىق دەنساۋلىق ساقتاۋ باسقارماسىنىڭ AYALA قايىرىمدىلىق قورىمەن, «مەيىرىمدىلىك» ەرىكتى قوعامى» قورىم جانە «ساتر» ورتالىعىمەن جاساعان مامىلەلەرىنىڭ اياسىندا ىسكە اسىرىلا باستاعانىن ايتۋ كەرەك.
جاڭا دياگنوستيكالىق اپپاراتتار تسيفرلىق ترەككينگ ورتالىعىنا قوسىلعان. پەرزەنتحانالار مەن ەمحانالاردىڭ مەدبيكەلەرى وسى جابدىقپەن جۇمىس ىستەي الۋى ءۇشىن ارنايى وقىتۋدان ءوتتى. ەندى تەست ناتيجەلەرى اۆتوماتتى تۇردە بىرىڭعاي بازاعا جىبەرىلەدى, وندا دارىگەرلەر ديناميكانى باقىلاپ, بالا تۋىلعاننان كەيىنگى ءۇشىنشى ايدا ەمەس, پەرزەنتحاناداعى العاشقى اۋديولوگيالىق سكرينينگتەن كەيىنگى ون ءتورتىنشى كۇنى تەكسەرۋ ساپاسىن باقىلاي الادى. مۇنداي ءتاسىل دەرەكتەردى جوعالتپاي, قاتەلىكتەر ىقتيمالدىعىن تومەندەتە وتىرىپ, دياگنوستيكانىڭ دالدىگىن ارتتىرادى.
«وسى جوبانىڭ ارقاسىندا تاۋەكەل توبىنداعى بالالار قىمبات ۋاقىتتارىن جوعالتپاي, دەر كەزىندە ەمدەلە الادى. قۇلاعى ناشار ەستيتىن بالالار قالا بيۋدجەتى ەسەبىنەن تەگىن ەستۋ اپپاراتتارىن الا الادى. بۇل مىڭداعان بالاعا ساۋابى تيەتىن – مەملەكەت پەن قوعامنىڭ ىنتىماقتاستىعىنىڭ تاماشا ۇلگىسى», دەيدى الماتى قالالىق قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى نازگۇل يمانعاليەۆا.
سونىمەن تەرەڭدەتىلگەن سكرينينگ بارىسىندا ەستۋ كەمىستىگى انىقتالعان جاعدايدا, قوسىمشا تەكسەرۋ ءۇشىن بالانى ماماندارعا جىبەرەدى. قاجەت بولعان جاعدايدا «دوم» قورىنىڭ «بالالارعا ءومىر سىيلا» جوباسى شەڭبەرىندە ەستۋ اپپاراتتارى بەرىلەتىن بولادى. ال ەستۋدى پروتەزدەۋ ءمامس ەسەبىنەن الماتى قالاسىنداعى № 5 قالالىق كلينيكالىق اۋرۋحانادا جۇرگىزىلەدى.
الماتى