ۇلتتىق سپورت - ۇلت ۇستىنى

قازاقتىڭ ۇلتتىق ويىندارىن زەرتتەۋشى بازاربەك ورتەنباي ۇلى ىقىلىم زاماننان بەرى قازاقتىڭ بايتاق دالاسىن مەكەندەگەن جانە قازاقتىڭ ارعى تەگى بولعان تۇركى تىلدەس تايپالار عاسىرلار بويى وزدەرىمەن بىرگە جاساسقان ۇلت ويىندارىن ۇنەمى دامىتىپ, ءومىر اعىمىنا قاراي جەتىلدىرىپ وتىرعانىن عىلىمي نەگىزدە دايەكتەگەن. 

عالىمنىڭ ساراپتاما ەڭبەكتەرىندە العاشقى قاۋىمدىق قۇرىلىس كەزىندە-اق تايپالاردىڭ كۇندەلىكتى تىرشىلىك اعىمىنان تۋىنداعان وزىندىك ءار ءتۇرلى: قاراگيە, تاياق جۇگىرتۋ, جىلمان, قاقپا تاس, ساداق اتۋ سىندى ۇلتتىق ويىندارى بولعانى ايتىلادى. تاس داۋىرىندە ويىنعا وڭدەلگەن تاس قولدانىلسا, كەيىن بەرتىن كەلە اعاش, مالدىڭ سۇيەگىن پايدالانعان. تەمىر پايدا بولعان كەزدە ويىندارعا تەمىر قۇرالدارىن جاراتقان. فەودالدىق داۋىردە اقبايپاق, التىباقان, ارقان تارتىس سىندى جاڭا ويىندار تۋعان. 

ەرتەدەن بۇگىنگە دەيىن جەتكەن ويىنداردىڭ بۇگىندە اتاۋى وزگەرگەنمەن, ىشكى مازمۇنى ساقتالعان. ماسەلەن: قاراگيە - نايزا لاقتىرۋ, قاقپا تاس - بەس تاس, ساداق اتۋ - جامبى اتۋ بولىپ وزگەرگەنمەن, ويىن ەرەجەسى سول قالپىندا ساقتالعان. 

بۇگىندە ۇلتتىق سپورتتى سەرىك ەتۋشىلەر قاتارى قالىڭداپ, ارناسى كەڭىپ, ناسيحاتى ارتىپ كەلەدى. تۋريزم جانە سپورت مينيسترلىگىنىڭ دەرەگىنشە, ەلىمىزدە 666 مىڭنان اسا ادام ۇلتتىق سپورت تۇرلەرىمەن شۇعىلدانادى. سونداي-اق, رەسپۋبليكا بويىنشا ۇلتتىق سپورت تۇرلەرىنەن 16 555 ۇيىرمە جۇمىس ىستەپ تۇر. 

ۇلتتىق سپورتىمىزدىڭ جاڭعىرۋىنىڭ كەيىنگى مىسالى رەتىندە بىلتىر كۇزدە ەلوردادا وتكەن 5-ءشى دۇنيەجۇزىلىك كوشپەندىلەر ويىندارى دەپ اۋىز تولتىرىپ ايتۋعا بولادى. 

ۇلى دالانى دۇبىرگە بولەگەن جارىسقا الەمنىڭ 90-عا جۋىق مەملەكەتىنەن 2500-دەن استام سپورتشى قاتىسىپ, 21 سپورت تۇرىنەن 97 مەدال جيىنتىعىن ساراپقا سالدى. بۇل ماڭىزدى وقيعا ەتنومادەني قوزعالىسقا, ۇلتتىق سپورت تۇرلەرىن دامىتۋعا دا تىڭ سەرپىن بەردى.

ۇلتتىق سپورت تۇرلەرى بالانى ەپتىلىككە, العىرلىققا, تاپقىرلىققا تاربيەلەيدى.  توعىزقۇمالاق ويناۋشىنىڭ زەيىن-زەردەسىن ۇشتاسا, كوماندالىق كوكپار, ارقان تارتۋ سىندى ويىندار وزگەمەن تەز ءتىل تابىسىپ, بىرلىكتىڭ ماڭىزىن ءۇنسىز تۇسىندىرەدى.