18 ناۋرىز كۇنى ابىلحان قاستەەۆ اتىنداعى مەملەكەتتىك ونەر مۋزەيىندە بەينەلەۋ ونەرىنىڭ كورنەكتى وكىلى ورال تاڭسىقباەۆتىڭ 120 جىلدىق مەرەيتويىنا ارنالعان كورمەنىڭ سالتاناتتى اشىلۋى ءوتتى, دەپ حابارلايدى Egemen.kz.
كورمە وزبەكستان رەسپۋبليكاسىنىڭ مادەنيەت جانە ونەردى دامىتۋ قورىنىڭ ۇيىمداستىرۋىمەن جانە قازاقستان رەسپۋبليكاسىنىڭ مادەنيەت جانە اقپارات مينيسترلىگىنىڭ قولداۋىمەن ۇيىمداستىرىلدى.
ەكسپوزيتسيادا سۋرەتشىنىڭ ەرەكشە ءستيلىن, شىعارماشىلىق مۇراسىن جانە ۇلتتىق كەسكىندەمەنىڭ دامۋىنا قوسقان ۇلەسىن كورسەتەتىن 74 تۋىندى ۇسىنىلعان.
ءىس-شارانىڭ اشىلۋ راسىمىنە قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالاەۆا, وزبەكستان رەسپۋبليكاسى پرەزيدەنتىنىڭ كومەكشىسى سايدا ميرزيوەۆا, الماتى قالاسىنىڭ اكىمى ەربولات دوساەۆ, سونداي-اق قازاقستان مەن وزبەكستاننىڭ جازۋشىلارى, مادەنيەت جانە ونەر قايراتكەرلەرى قاتىستى.
ايدا بالاەۆا ءوز سوزىندە ورال تانسىقباەۆتىڭ ونەرى ەكى ەلدىڭ حالقىن جاقىنداستىرىپ, سانعاسىرلىق دوستىق پەن ءوزارا تۇسىنىستىكتى نىعايتۋعا ۇلەس قوسقانىن اتاپ ءوتتى.
«ول تۋعان جەرى وزبەكستاننىڭ كوركەم تابيعاتى مەن تاۋ-تاسىن شىنايى ءارى اسقان شەبەرلىكپەن بەينەلەپ, ونەرسۇيەر قاۋىمنىڭ جوعارى باعاسىن الدى. ايتا كەتەرلىگى, ورال تاڭسىقباەۆ ءابىلحان قاستەەۆپەن ءبىر جىلدا دۇنيەگە كەلگەن. ەكى ازامات تا ءوز ەلدەرىندە ۇلتتىق كوركەمسۋرەت مەكتەبىنىڭ قالىپتاسۋىنا ىقپال ەتىپ, كەيىنگى تولقىن جاستارعا اسەر ەتتى. ولاردىڭ شىعارماشىلىعى – تۋعان جەرىنە, حالقىنا, تابيعاتىنا دەگەن شىنايى سۇيىسپەنشىلىكتىڭ كورىنىسى», دەدى ايدا بالاەۆا.
سونداي-اق مينيستر قازاقستان مەن وزبەكستاننىڭ مادەني سالاداعى بەلسەندى ىنتىماقتاستىعىن اتاپ ءوتتى. كەيىنگى جىلدارى مادەنيەت كۇندەرى, كينو كۇندەرى, تەاتر گاسترولدەرى مەن كوركەمونەر كورمەلەرى جەمىستى ۇيىمداستىرىلىپ كەلەدى.
سايدا ميرزيوەۆا ءوز كەزەگىندە كورمەنىڭ ۇيىمداستىرىلۋىنا ريزاشىلىعىن ءبىلدىرىپ, قازاقستان مەن وزبەكستان اراسىنداعى مادەني ديالوگ پەن ىنتىماقتاستىقتىڭ ماڭىزىن اتاپ ءوتتى.
ورال تاڭسىقباەۆتىڭ 120 جىلدىق مەرەيتويىنا ارنالعان كورمە وسى جىلدىڭ ماۋسىم ايىنا دەيىن جالعاسادى.
ايتا كەتەيىك, وزبەكستان ۇلتتىق بالەتىنىڭ گاسترولدەرى مەن ورال تاڭسىقباەۆ كورمەسى استانادا دا ۇيىمداستىرىلادى.