استانا قالاسى ورتالىقتاندىرىلعان كىتاپحانالار جۇيەسى №3 بالالار كىتاپحاناسى ۇجىمىنىڭ ۇيىمداستىرۋىمەن «17 ناۋرىز – مادەنيەت جانە ۇلتتىق سالت-ءداستۇر» كۇنىنە وراي تانىمدىق, ەتنوگرافيالىق ساباق ءوتتى.
وندا ەلوردانىڭ №14 مەكتەپ-گيمنازياسىنىڭ باستاۋىش سىنىپ وقۋشىلارى قاتىسىپ, كىتاپحاناشىلار دايىنداعان «سەن سالت-ءداستۇردى بىلەسىڭ بە؟» اتتى تانىمدىق سۇراق-جاۋاپ ساباعىنا قاتىسىپ, حالقىمىزدىڭ سالت-داستۇرلەرىمەن تانىستى.
اتاپ ايتار بولساق, جاس ورەندەر حالقىمىزدىڭ تۇرمىستىق قۇندى مۇرالارى: جاڭا تۋعان سابيگە ات قويۋ, بەسىككە سالۋ, قىرقىنان شىعارۋ, تۇساۋ كەسۋ, اتقا مىنگىزۋ, توقىم قاعۋ قاتارلى سالت-ءداستۇرىمىزدىڭ ماڭىزدىلىعىمەن تانىسىپ, ەجەلدەن كەلە جاتقان كوشپەلى قوعامنىڭ عۇرىپتىق سالتى: ء«سۇيىنشى سۇراۋ», «بازارلىق بەرۋ», «شاشۋ شاشۋ», «ەرۋلىك», «قالاۋ», «قۇتتى بولسىن ايتۋ» سياقتى ەتنوگرافيالىق ۇعىمداردىڭ تەرەڭىنە ءۇڭىلدى.
سونىمەن قاتار جەتكىنشەكتەر بۇرىنعىلاردىڭ «جەتى اتاسىن بىلگەن ەر – جەتى جۇرتتىڭ قامىن جەر» دەگەنىندەي, حالقىمىزدىڭ گەنەتيكالىق-تۋىستىق قاتىناسى حاقىندا جۇيەلى تۇسىنىككە قانىعىپ, كوشپەلى بابالارىمىزدىڭ بەرەكەلى ازىعى سانالاتىن ۇلتتىق تاعامدار: قۇرت, ىرىمشىك, قىمىز, جەنت, باۋىرساق, ت.ب. تۋرالى مالىمەتكە سۋسىندادى.
ساباق بارىسىندا مەكتەپ وقۋشىلارى ءوزارا ۇلتتىق ويىندار ويناپ, ناۋرىز جۇمباق شەشىپ سايىستى. سوڭىندا جاس قوناقتار وتاندىق ءھام حالىقارالىق ءان بايقاۋلارىنىڭ جۇلدەگەرى, بولاشاعىنان زور ءۇمىت كۇتتىرەتىن دارىندى ءانشى ايگەرىم ماناپوۆا شىرقاعان اندەردى تىڭداپ, وقۋشى قىزداردىڭ «قاماجاي» بيىنە ءتانتى بولدى.